Еве кои банки веќе ги исплатија октомвриските пензии — пензионерите нека ги проверат своите сметки

Исплатата на октомвриските пензии во Северна Македонија започна пред редовниот календар — дел од банките ги ставија средствата на располагање на клиентите уште на 29 и 30 октомври 2026 година, па многу пензионери веќе можат да располагат со парите пред почетокот на новиот месец.

Кои банки платиле порано

АЛТА банка Битола и Силк Роуд Банка ги изненадија своите корисници со рана исплата на 29 октомври. Повеќето други банки ги префрлија средствата на 30 октомври, последниот работен ден во месецот.

Стопанска банка АД Скопје официјално извести: „Почитувани корисници, известуваме дека се процесираат пензиите за месец октомври и со средствата можете да располагате денес преку вашите платежни картички или преку нашите филијали. Уживајте во месецот и искористете го со убави моменти!“

Шпаркасе банка АД Скопје потсети на новиот систем кој важи од октомври 2026 година: „ПЕНЗИЈА ПРЕД ПРВИ! Ве известуваме дека од октомври 2026 година се воведува нов начин на исплата на пензиите. Исплатата ќе се врши последниот работен ден во месецот. Пензиите за октомври 2026 година ќе бидат достапни на сметките на сите корисници кои имаат платежна сметка во Шпаркасе банка на 30.10.2026 година (петок). Средствата можете да ги подигнете од банкоматите на Шпаркасе банка низ државата или да плаќате безготовински при секое ваше пазарење.“

Комерцијална банка исто така потврди дека од 30 октомври пензиите се на сметките на корисниците, достапни за готовинско подигнување на шалтерите и банкоматите, како и за електронски плаќања. Халкбанк извести дека средствата се веќе достапни, а клиентите кои дале соодветна согласност истите можат да ги подигнат и преку поштенските единици на Пошта на Северна Македонија. Исплата на 30 октомври реализираа и ТТК Банка и Централна кооперативна банка.

Оваа исплата веќе ги вклучува примените законски зголемувања од претходниот месец. Пензиите продолжуваат да се исплаќаат со процентуалното усогласување од 3 отсто, кое стапи на сила со септемвриската исплата. Според законската формула (врз основа на трошоците за живот и растот на просечната плата), просечната пензија од околу 28.100 денари достигнува износ од приближно 29.000 денари (раст меѓу 830 и 900 денари), додека повисоките пензии од околу 45.000 денари бележат зголемување меѓу 1.350 и 1.500 денари.

Пензионерите можат да ја проверат состојбата на своите сметки преку апликациите за електронско банкарство, на банкоматите или директно во филијалите на својата банка.

Фото: Гламур