Европските влади ги повикуваат граѓаните да создадат резерви за 72 часа

Сè повеќе европски влади ги повикуваат домаќинствата да обезбедат резерви од храна, вода, лекови и други основни производи за да можат самостојно да преживеат најмалку 72 часа во случај на криза. Властите велат дека препораките се дел од пошироките подготовки за можни природни катастрофи, кибернапади, прекини во снабдувањето со струја и вода и безбедносни ризици поврзани со воени конфликти.

Национални кампањи и конкретни совети

Темата повторно доби внимание во последните денови од октомври, откако неколку држави објавија нови кампањи и предупредувања. Британската влада на 22 октомври започна тригодишна национална кампања под името „Биди подготвен“, со која ги повикува домаќинствата да обезбедат резерви за најмалку три дена. Британските препораки ги вклучуваат: храна со долг рок на траење, вода за пиење, лекови, батериски лампи, радио и готовина, за случај кога прекините во електричната енергија и комуникациите ќе го отежнат секојдневното функционирање.

Француските власти исто така ги повикуваат граѓаните да подготват комплет за итни случаи што ќе овозможи самостојно функционирање во првите 72 часа. Препораките вклучуваат шест литри вода по лице, конзервирана храна, неопходни лекови, батерии, радио и копии од важни документи.

Во Луксембург, владата на 9 октомври претстави национален прирачник за преживување во првите 72 часа од криза, а од 14 октомври започна распределбата на околу 300.000 примероци до домаќинствата. Националниот кризен центар на Белгија на 1 октомври објави практичен водич за подготовка на населението. Холандската влада на 12 октомври започна нова фаза од кампањата за подготвеност; објавените податоци покажуваат дека повеќе од четири од десет граѓани веќе презеле мерки за да можат да издржат 72 часа без струја, вода или интернет.

Слични препораки веќе постојат во Германија, Полска, Финска, Шведска и Норвешка. Во Полска и Финска се советува создавање домашни резерви за најмалку три дена. Шведска и Норвешка советуваат граѓаните да бидат подготвени за една недела, додека Германија препорачува резерви што би биле доволни за десет дена.

Овие активности надоврзуваат на стратегијата на Европската комисија од март 2025 година, која предвидува граѓаните на ЕУ да бидат во состојба самостојно да ги задоволат основните потреби најмалку 72 часа во случај на сериозна криза. Европските институции предупредуваат дека геополитичките тензии, вооружените конфликти, киберзаканите и климатските промени ја зголемуваат потребата од подобра подготвеност.

И покрај интензивирањето на кампањите во повеќе држави, официјалните лица нагласуваат дека препораките се однесуваат на различни кризни сценарија и сами по себе не претставуваат најава за непосредна воена или друга специфична опасност.

Фото: прес-материјал од настанот