Филип Милошевски: Кога ја претставуваш Македонија — не се преговара за имиња и ознаки

Поранешниот генералeн секретар на Ракометната федерација на Македонија, Филип Милошевски, по натпреварот во Грција и телевизискиот пренос на кој се појави кратенката „NMKD“, испрати јасна порака до новото раководство на федерацијата. Милошевски, кој заедно со Живко Мукаетов со години градеше идентитетот на репрезентацијата во Европа, ја поврза денешната ситуација со епизода од минатото и побара институционален пристап за правилна употреба на името и ознаките.

Пример од 2015 и повик за дисциплина

Во својата порака, тој се наврати на конкретен настан од пред една деценија за да ја објасни важноста на ставот.

„На 12 јануари 2015 година, сениорската ракометна репрезентација на Македонија слета во Доха, по настапот на подготвителниот турнир во Нант, Франција, непосредно пред почетокот на Светското првенство.

По сериозно долго патување, на аеродромот нè пречека автобус на кој пишуваше „FYR Macedonia“.

Им кажав на момците да почекаат. Стапив во контакт со организаторот и по околу еден час автобусот беше „ребрендиран“. Дури потоа се качивме и тргнавме кон хотелот.

Од делегацијата, која броеше најмалку триесетина луѓе, ниту еден не кажа ниту збор. Немаше негодување, немаше прашања зошто чекаме. Сите знаеја зошто го правиме тоа. Затоа што кога ја претставуваш Македонија, постојат работи за кои не се преговара.“

Милошевски нагласува дека станува збор не за суета, туку за достоинство, протокол и почит кон репрезентацијата и бара Ракометната федерација на Македонија институционално да постапи за да се избегне неправилна употреба на името и ознаките во иднина.

Во однос на резултатот, тој потенцира дека еден натпревар не го дефинира целиот квалификациски циклус и потсетува на минатите соочувања со Грција — поразот во 2002 година во Кукуш и поразот во 2018 година во Козани — но и на последователните чекори: баражот за СП 2003 (каде што бевме елиминирани од Исланд) и пласманот на Европското првенство 2020, обезбеден и покрај претходните неточни резултати.

Како заклучок, тој им порача на новите лица во раководството да ги консолидираат сите расположливи знаења и искуства, да ги слушаат различните ставови и да носат одлуки во интерес на репрезентацијата. „Ако успеете, јас ќе бидам меѓу првите што јавно ќе ви честитаат и искрено ќе го поздрават вашиот успех,“ напиша Милошевски и го заврши со: „Секогаш со ❤️ за Македонија 🇲🇰🇲🇰! Спортски поздрав!“

Фото: прес-материјал од настанот