Филипче бара итна истрага по нападот врз младите во Ново Село

Од Ново Село, претседателот на СДСМ, д-р Венко Филипче, побара итна истрага и брза реакција од надлежните институции по, како што оцени, синоќешниот напад врз млади активисти на партијата, нарекувајќи го инцидентот сериозен и неприфатлив.

Филипче: Итни проверки од МВР и обвинителството

Во својата изјава од Ново Село, Филипче побара Министерството за внатрешни работи и обвинителството да ги утврдат сторителите и веднаш да постапат. „Бараме итна истрага, итна реакција на Министерството за внатрешни работи, итна истрага на обвинителството, кои беа тие луѓе? Затоа што беа активисти на ВМРО, затоа што беа луѓе блиски на Христијан Мицкоски. Тие луѓе кои што посегнаа по тоа да физички се пресметаат со младите деца кои ја говореа вистината“, рече Филипче.

Тој оцени дека нападот претставува обид за заплашување и замолчување на секој кој мисли поинаку од власта и нагласи дека младите нема да останат сами. „Упатувам порака, децата не се сами. Не беа сами синоќа, не се сами денеска, нема да бидат сами ниту утре. Ова е знак дека власта е исплашена. Исплашена е заради тоа што излегува вистината за загадената вода, излегува вистината за економијата, излегува вистината за Европа, излегува вистината за тоа дека сега сме слепо црево на Европа“, рече Филипче.

Тој предупреди дека доаѓа време на правда и вистина и дека Владата на ВМРО ќе одговара за, како што рече, криминалите, особено за нападот врз младите. „Доаѓа време на правда и вистина. И ќе одговараат. Ќе одговараат за сите криминали, а најмногу за тоа што посегнаа по децата поради тоа што единствено нешто што децата правеа ќе повторам,  ја говореа вистината“, рече Филипче.

Филипче додаде дека ваквите обиди за заплашување нема да ја замолчат СДСМ и граѓаните кои јавно ја кажуваат вистината. „Оваа власт нема да не замолчи. Ако ова е порака дека секој кој што мисли различно и кој што ја говори вистината, ќе биде замолчен и со него физички ќе се пресметаат, упатувам јасна порака – нема да им успее. Доаѓа време на вистина и правда“, порача тој.

Лидерот на СДСМ повтори повик до институциите да постапат брзо, да ги идентификуваат сторителите и да обезбедат заштита за младите активисти, а нападот го оцени како знак за стравот на власта поради јавните откритија за прашања како загадувањето на водата и економската состојба.

Фото: прес-материјал од настанот