Фон дер Лајен во Приштина: Пресудата од Хаг мора да се почитува
Фон дер Лајен рече дека пресудата е за индивидуална одговорност и повика на зачувување на сеќавањето на жртвите.
Претседателката на Европската комисија, Урсула фон дер Лајен, од Приштина порача дека пресудата од Хаг мора да се почитува и дека е донесена од независна судска институција. Изјавата ја даде на заедничка прес‑конференција со косовскиот премиер Албин Курти, за време на нејзината посета на Косово во рамки на балканската турнеја.
„Пресудата на Специјализираните совети предизвика силни емоции. Ја ценам вашата одмерена реакција, како и реакцијата на политичките лидери кои повикуваат на смиреност“, рече фон дер Лајен на прес‑конференцијата.
Реакции во Приштина
Премиерот Албин Курти рече дека Судот јасно ставил до знаење дека намената на пресудата во никој случај не била да ја поткопа правдата или легитимитетот на ослободителната војна. Сепак, Курти изрази загриженост за други аспекти од пресудата и за високите казни, и очекува тие прашања да бидат разгледани во жалбената постапка.
Фон дер Лајен, прашана за иницијативата на Демократската партија на Косово за законски промени кои би ја ограничиле надлежноста на Специјализираните совети во Хаг, рече дека одлуката по тоа прашање е на Косово, но нагласи дека е важно да се гарантира независноста на судството.
„Но, едно е јасно – оваа пресуда е за индивидуалната одговорност на обвинетите. Отпорот на Косово не беше на судење. Мора да го зачуваме сеќавањето на сите жртви од сите заедници“, изјави шефицата на Европската комисија.
Косовскиот парламент усвои декларација со која ја отфрли како неприфатлива пресудата против поранешните водачи на Ослободителната војска на Косово. Фон дер Лајен повика на смиреност и на почитување на сеќавањето на жртвите од сите заедници.
Фото: EPA/OLIVIER HOSLET
