Франција тивко распоредила редовни војници во Украина во мисија „Волија“
Мали тимови од француската копнена армија обучуваат украински сили и одржуваат испорачани системи, додека логистиката се врши преку единица во Полска.

Француски обучувачи со месеци престојуваат на украинска територија, каде што обучуваат припадници на украинската армија, обезбедуваат техничка помош и помагаат во одржувањето на сложените системи за оружје што Франција ѝ ги испорачала на Киев, јавуваат неколку извештаи.
Мисијата, според информациите, носи кодно име „Волија“ и ја води француски генерал. Описана е како структура која работи преку мали тимови и краткорочни ангажмани, со цел да се намали јавната и политичката експозиција.
Има индикации дека припадниците припаѓаат на редовните единици на копнената армија, додека специјалните сили не се вклучени во операцијата. Нивните задачи ги опфаќаат обуката на украинските војници, техничката поддршка и учеството во одржувањето на испорачаните напредни системи за вооружување.
Логистика и уставни прашања
Според објаснувања за организацијата на присуството, мисијата „Зерфо“, официјално распоредена во Полска во рамките на европска мрежа за воена помош, се користела како логистичка поддршка и како канал за трансфер на француски војници во Украина.
Начинот на кој, наводно, е организирано распоредувањето отвора правни и политички прашања во Франција. Член 35 од францускиот Устав предвидува дека владата мора да го информира парламентот за одлуката за ангажирање на вооружените сили во странство најдоцна три дена по почетокот на интервенцијата.
Претседателот на Сенатската комисија за надворешни работи, одбрана и вооружени сили, Седрик Перен, изјави: "информирањето на парламентот во такви околности е уставна обврска и дека тоа не може едноставно да се заобиколи со повикување на доверливоста на мисијата."
Дали конкретниот ангажман правно се смета за воена интервенција останува предмет на толкување, и досега не е објавена официјална одлука дека е прекршен Уставот. Извор запознаен со мисијата потврдил присуство на мали групи француски војници, нагласувајќи дека нивната задача не е учество во борбите.
Фото: прес-материјал од настанот


