Pronari i “Silbo” emërohet drejtor i qendrës më të madhe për provime për shoferë në vend

Njëri nga bashkëthemeluesit e markës së bukës “Silbo”, Bobi Milev, mori në drejtim operatorin më të madh të provimeve për shoferë në Shkup.

Pronari i kompanisë Zhito klas Silbo, që nga muaji i kaluar është emëruar drejtues i Auto Ispiten Centar Shkup dhe do të menaxhojë edhe degët e qendrave për provime të trafikut në Karposh, Centar, Çair, Aerodrom dhe Gazi Baba.

Ndryshim në pronësi dhe drejtim

Qendra për Provime të Automjeteve Shkup ka pronar të ri që nga muaji i kaluar: Aleksandar Karafilovski zëvendësoi pronarin e mëparshëm, Viktor Serafimov. Po atë kohë Bobi Milev e zëvendësoi Mirjana Boshkovska në detyrën e drejtorit. Në fund të vitit të kaluar kompania shënoi të ardhura prej gati dy milionë eurosh dhe kishte 48 të punësuar.

Auto Ispiten Centar Shkup është një kompani private që kryen një aktivitet monopol publik — organizimin dhe zhvillimin e provimeve për drejtuesit e automjeteve në zonën e Shkupit. Qendra zhvillon pjesën teorike dhe praktike të provimeve për kandidatët për shoferë për të gjitha kategoritë dhe nënkategoritë e automjeteve.

Sipas ligjit, subjektit i nevojitet një licencë nga Ministria e Punëve të Brendshme dhe duhet të plotësojë kushte të përcaktuara në mënyrë të rreptë për hapësirë, staf dhe pajisje teknike për të operuar. Qendra hyri në këtë aktivitet në vitin 2018, kur mori përgjegjësinë për organizimin e provimeve nga operatori i mëparshëm, AMSM Exam Center.

Kompania u themelua më 19 qershor 2018, dhe raportimet e asaj kohe e përshkruan si pronar dhe drejtues atëherë 26-vjeçarin Viktor Serafimov.

Foto: Слободен Печат / Драган Митрески