Голем пожар беснее во јужна Албанија, закана кај Делвина и Финиќ

Голем пожар беснее во јужниот дел на Албанија, во околината на Делвина и Финиќ, а министерот за внатрешни работи, Бесфорт Ламалари, предупреди дека состојбата е критична.

Акција од земја и воздух

„Со часови се соочуваме со тешка ситуација поради пожарите во неколку села во Делвина и Финиќ, а апсолутен приоритет на службите е заштита на населението и домовите. Сите наши структури се на терен и операцијата продолжува без прекин, и од земја и од воздух, со ангажирање на бројни противпожарни сили, државната полиција, вооружените сили, локалните служби и три хеликоптери, два „Кугер" и еден „Блек хок““, наведува Ламалари.

Тој ги повика жителите да ги почитуваат упатствата на властите и да избегнуваат каква било акција што би можела да создаде дополнителен ризик.

Во меѓувреме, пожари се гаснат и на повеќе други локации низ земјата, но најсериозна е состојбата кај планината Дарда, а потоа кај Либражд, Малакастар и Балш.

На терен се ангажирани противпожарни екипи, државната полиција и вооружените сили, а операцијата се изведува комбинирано од земја и од воздух со трите хеликоптери што ги посочи министерот.

Властите велат дека операцијата продолжува без прекин и апелираат до населението да остане воздржано и да ги следи безбедносните упатства додека екипите се борат да го сопрат ширењето на огнот.

Фото: прес-материјал од настанот