Голем скандал: Зоран Ванев ги обвини раководителите на „Макфест“, следува тужба за клевета

Македонската музичка сцена е потресена по објавите на познатиот фолк-изведувач Зоран Ванев, кој јавно ги обвини раководните луѓе на фестивалот „Макфест“ за низа злоупотреби.

Во своите постови Ванев ги именуваше уметничкиот директор Роберт Саздов и продуцентот Јован Јованов и тврдеше дека најстариот фестивал бил претворен во „приватна фирма“, со фаворизирање преку јавен конкурс и прелевање пари од Општина Штип во џебовите на наводен музички клан. Ванев, кој веќе со децении живее во Швајцарија, побара вклучување на Државниот завод за ревизија, Финансиската полиција и Обвинителството во проверка на работата на Општина Штип и организацијата на фестивалот.

Поддршка на овие тврдења дојде и од еден од основачите и поранешен директор на фестивалот, Стојан Троицки, кој истакна дека фестивалот „Макфест“ одамна станал „партиски приврзок за перење пари“, додавајќи дека во негово време титулата „уметнички директор“ воопшто и не постоела.

Правна реакција

Реакцијата од страна на наведените лица следеше преку нивниот правен застапник, адвокат Јанаки Митровски. Роберт Саздов и Јован Јованов ги демантираа сите наводи, оценувајќи ги како лажни, неосновани и изнесени од „ниски и одмазнички побуди“. Според нивната одбрана, нападот се појавил поради тоа што песната на Ванев била одбиена на овогодинешниот конкурс.

Тие покренаа постапка за клевета и навреда пред надлежниот суд, со барање за отштета во висина од 6.200.000 денари (околу 100.000 евра) за нарушување на нивната чест и професионален углед.

Ванев, меѓутоа, не се повлече. Во најновата реакција објавена на социјалните мрежи тој порача: „Едвај чекав да ја отворите Пандорината кутија, самите ќе се закопате. Социјалните мрежи не се судница – мојата објава имаше функција на свиркач, а неизбришливите и материјални докази со кои располагам ќе ги изнесам безмилосно пред Судот!“ – порача Ванев, нагласувајќи дека неговиот честит образ и кредибилитет вредат повеќекратно над сумата на тужбата.

Прашањето дали „Макфест“ ќе ги преживее овие потреси ќе зависи од правниот епилог и натамошните истраги; во моментов јавната пресметка се пресели од социјалните мрежи пред судските институции.

Фото: прес-материјал од настанот