Гостиварци ослободени од плаќање на августовската сметка за вода

Советот на Општина Гостивар одлучи да ги ослободи граѓаните од плаќањето за вода за пиење и за собирање смет за месец август, поради неодамнешната забрана за пиење вода и прогласената епидемија.

Претседателот на Советот посочи дека идејата за подолг период беше напуштена поради финансиски ограничувања.

На денешната седница, Советот на Општина Гостивар одлучи дека сметките за комуналните услуги — вода за пиење и собирање смет — за месец август нема да бидат наплатени од жителите на градот. Ослободувањето важи само за августовскиот период.

Оваа одлука следува по инцидентот со квалитетот на водата во Гостивар: водата беше забранета за пиење од 17 јули до 14 август, а епидемија беше прогласена на 19 јули. Епидемијата траеше до 21 август, а градот беше ставен во 30‑дневна кризна состојба.

Претседателот на Советот, Валдет Џафери, рече дека првично се размислувало ослободувањето да опфати повеќе месеци, но дека конечната одлука била донесена според реалната финансиска можност на општината: „Сметавме дека треба да биде два месеци или три, но идејата е да може тоа да се реализира, да се изврши“, рече Валдет Џафери, претседател на Советот на Општина Гостивар.

Во Гостивар, комуналните сметки се состојат од две услуги — за вода за пиење и за собирање смет. Дел од домаќинствата имаат водомери, додека други плаќаат паушални износи за потрошената вода за пиење. За надоместот за собирање сметот, сумата се определува според површината на станбениот простор и дворот кај оние со куќи.

Во јули, полицијата пронајде пумпи со кои во гостиварската водоводна мрежа биле внесувани дополнителни количества вода од несоодветни извори; за тоа се осомничени тројца раководители од јавното претријатие „Комуналец“, кои добија и притвор.

Александар Самарџиев

Фото: прес-материјал од настанот