Град Скопје и уште неколку општини добија 49 нови возила и специјализирана опрема за комунална хигиена

Градот Скопје и уште осум општини — Куманово, Прилеп, Охрид, Тетово, Неготино, Кичево, Дебар и Велес — добија распределба од вкупно 49 нови возила и специјализирана опрема за комунална хигиена и чистење на улиците.

Во пакетот се вклучени 19 мултифункционални камиони од различен тип, девет специјализирани камиони и цистерни и 21 мултифункционално возило. Јавното претпријатие "Комунална хигиена" од Скопје ќе добие околу дваесетина специјални возила за трајно користење, меѓу кои камиони со зафатнина од 3, 8, 17 и 20 кубни метри, автоцистерни за машинско миење на улиците и метларки за машинско метење.

Набавка преку проект со Светската банка

Набавката е реализирана преку Министерството за транспорт, во рамките на долгогодишен проект со Светската банка за ревитализација и изградба на нови локални и регионални улици, што се спроведува низ сите општини во државата.

Министерот за транспорт и вицепремиер Александар Николоски на промоцијата на возилата истакна дека набавката била спроведена транспарентно и дека од проценетата вредност од 5,5 милиони евра опремата е набавена за 4,2 милиони евра, со што е остварена заштеда од околу 1,3 милиони евра.

Скопскиот градоначалник Орце Ѓорѓиевски оцени дека современата механизација ќе овозможи побрзо, поефикасно и поредовно собирање на отпадот, што ќе придонесе за почисти јавни површини и поздрава животна средина за граѓаните. Тој најави дека Градот Скопје со сопствени средства дополнително набавува уште специјализирани возила и над 3 300 нови контејнери, за кои постапката е во завршна фаза.

Локалните служби очекуваат дека по ставање во употреба новиот возен парк и опрема ќе биде значително унапредена брзината и квалитетот на одржувањето на улиците и јавните површини во опфатените општини.

Фото: прес-материјал од настанот