Грчки цариници запленија над 1.000 боци нелегален фреон — 296 откриени во камион од Северна Македонија на Дојрани

Царинските службеници на Независната управа за јавни приходи (ААДЕ) на Грција запленија вкупно 1.296 боци нелегална разладна течност при контроли на два гранични премини — Дојрани кон Северна Македонија и Кипи кон Турција. По првичните пресметки, избегнатите царини и даноци се проценуваат на повеќе од 338.000 евра.

Од вкупниот број боци, 296 биле пронајдени во товарно возило што влегло во Грција од Северна Македонија. „Во раните утрински часови истиот ден, на граничниот премин Дојрани, при контрола на празен товарен контејнер од Северна Македонија, во специјално направена преграда биле откриени 296 боци нелегална разладна течност од типот R134a, за кои царините и даноците се пресметуваат во износ од 55.000 евра“, соопштија од ААДЕ.

Илегален товар скриен под пријавената пратка

Во друг случај, на преминот Кипи при контрола на товарно возило со турски регистарски таблички, биле откриени 1.000 боци фреон од типот R404A. Тие биле „внимателно скриени под пријавениот товар од гипс-картонски плочи“, наведуваат од управата.

Од ААДЕ посочуваат дека увозот на оваа течност во ЕУ е забранет. „Увозот на оваа течност во ЕУ е забранет. Вкупната вредност на товарот изнесува 884.400 евра, додека избегнатите царини и даноци се проценуваат на 283.538,64 евра“, пишува во соопштението.

Целиот нелегален товар од двата случаи е запленет, а надлежните органи ги спроведуваат предвидените законски постапки.

Фото: прес-материјал од настанот