Dogana greke sekuestron mbi 1,000 shishe ftohësi të paligjshëm — 296 të zbuluara në kamion nga Maqedonia e Veriut në Doirani

Sherbimet doganore greke të Autoritetit të Pavarur për të Ardhurat Publike (AADE) sekuestruan gjithsej 1.296 shishe me lëng ftohës të paligjshëm gjatë kontrolleve në dy pika kufitare: Doirani, drejt Maqedonisë së Veriut, dhe Kipi, drejt Turqisë. Vlerësohet se taksat dhe doganat e shmangura janë më shumë se 338,000 euro.

Nga numri i përgjithshëm, 296 shishe u zbuluan në një mjet tregtar që kishte hyrë në Greqi nga Maqedonia e Veriut. "Në orët e hershme të mëngjesit të të njëjtës ditë, në pikën kufitare Doirani, gjatë kontrollit të një konteineri bosh, me ngarkesë nga Maqedonia e Veriut, në një ndarje të përgatitur posaçërisht u gjetën 296 shishe të lëngut ftohës të paligjshëm të tipit R134a, për të cilat doganat dhe taksat llogariten në shumën prej 55,000 euro", njoftoi AADE.

Ngarkesa e madhe e fshehur nën mallin e deklaruar

Në kufirin e Kipit, gjatë kontrollit të një kamioni me targa turke, u gjetën 1,000 shishe me ftohës të tipit R404A. Ato ishin "fshehur me kujdes nën ngarkesën e deklaruar të pllakave të gipskartonit", bëri me dije AADE.

AADE theksoi se importi i këtij lëngu në Bashkimin Evropian është i ndaluar. "Importi i këtij lëngu në BE është i ndaluar. Vlera totale e ngarkesës është 884,400 euro, ndërsa doganat dhe taksat e shmangura vlerësohen në 283,538.64 euro", shtohet në deklaratë.

Të gjitha ngarkesat e paligjshme nga të dy rastet u sekuestruan dhe autoritetet kompetente kanë nisur procedurat ligjore të parapara.

Foto: material shtypi nga ngjarja