Greqia propozon rritje të gjobave për parkim dhe ndryshime në patentë
Propozimi parashikon gjoba më të larta për disa parkime por kufizon pezullimet e patentave për shkelje të vogla; masat e rënda mbeten për rreziqe serioze.

Greqia po përgatit ndryshime në rregullat e trafikut që do të rrisnin disa gjoba të parashikuara, ndërsa do të hiqnin ose shkurtonin pezullimet e përkohshme të patentave për shkelje me rrezik të ulët.
Sipas një prej propozimeve, gjoba për disa raste parkimi të gabuar do të rritet nga 30 në 60 euro, por vozitësit më nuk do të humbin patentën për periudhën aktuale prej dhjetë ditësh në ato raste. Ndryshimet shqyrtohen pasi Policia greke e Trafikut vuri në dukje se disa nga sanksionet mund të jenë në tepërsi në raport me seriozitetin e shkeljeve.
Përmirësimet e propozuara për parkimin përfshijnë, ndër të tjera, mosrespektimin e shenjave R-39 (ndalohet parkimi) dhe R-40 (ndalohet ndalimi dhe parkimi). Megjithatë, sanksionet e rrepta do të mbeten për parkimin në vendet dhe rampat e personave me aftësi të kufizuara, në trotuare, mbi kalime për këmbësorë dhe në korsitë e autobusëve.
Prejtime për ngarjen e motoçikletës pa kategori të duhur
Janë parashikuar edhe korrigjime për drejtuesit që ngasin motoçikletë pa kategorinë e duhur në patentë. Aktualisht kjo shkelje dënohet me 500 euro gjobë, pezullim të patentës për një vit dhe konfiskim të dokumenteve të regjistrimit dhe targave për 30 ditë. Sipas propozimit, pas një muaji dhe pas pagesës së gjobës, drejtuesi mund të ndjekë trajnimet e nevojshme, të marrë provimin për kategorinë përkatëse dhe, nëse e kalon provimin, të marrë patentën më herët.
Ministri i drejtësisë Giorgos Floridis i tha radios Parapolitika 90.1 se "disa dispozita mund të jenë të tepruara", duke përmendur rastin e një drejtuesi profesional që humb patentën sepse ka drejtuar një motoçikletë për të cilën nuk kishte kategorinë e duhur. Zv.ministri i Infrastrukturës dhe Transportit, Giorgos Kotsiras, theksoi se qasja ndaj shkeljeve serioze mbetet e pandryshuar: "Ne insistojmë në ndëshkimin e rreptë të shkeljeve serioze, dhe po bëjmë ndryshime individuale te shkeljet me rrezik të ulët, që sanksionet të jenë më proporcionale dhe më efikase".
Të dhënat e publikuara në Ethnos tregojnë se në dhjetë muajt e parë të këtij viti policia e trafikut regjistroi 431,441 shkelje për parkim të parregullt, 12.7 për qind më pak se në të njëjtën periudhë të vitit të kaluar. Ministria e Infrastrukturës dhe Transportit po përgatit projektligjin, i cili pritet së shpejti të dalë në konsultim publik. Ende nuk ka një listë përfundimtare të gjobave që do të ndryshojnë, as një datë hyrjeje në fuqi; deri atëherë mbeten në fuqi sanksionet aktuale.
Foto: material shtypi nga ngjarja


