Грција прогласи црвена тревога во девет региони поради поројни дождови

Девет региони во Грција се ставени под „црвена тревога“ до 29 октомври поради влошување на временските услови и очекуваните обилни врнежи и бури. Одлуката ја донесе Генералниот секретаријат за цивилна заштита врз основа на предупредување од Националната метеоролошка служба и проценка од Комитетот за проценка на ризик.

Опфатени региони

Предупредувањето ги опфаќа регионалните единици Евија, Фтиотида и Беотија во Централна Грција; Споради, Магнезија и Лариса во Тесалија; регионот Атика; Додеканските острови во Јужен Егеј и Северниот Егеј. За Атика и Северниот Егеј е наведено дека предупредувањето е прогласено како мерка на претпазливост.

Според Комитетот за проценка на ризик, денеска се очекуваат дожд и локални бури во источните и јужните делови на земјата, со најголем ризик во Евија, Магнезија и Северните Споради.

За утре е предвидено понатамошно влошување на времето, со поројни врнежи и бури во источна Тесалија, Северните Споради, источна Централна Грција, особено во Фтиотида и Беотија, како и во Евија и на островот Скирос.

Вооружените сили, полицијата, крајбрежната стража и другите надлежни служби се ставени во состојба на готовност. Регионалните и општинските власти се повикани да ја проверат својата подготвеност за реагирање и да ги мобилизираат потребните ресурси и опрема.

Статусот „црвена тревога“ подразбира целосна мобилизација на Националниот механизам за цивилна заштита, ангажирање на потребните човечки ресурси и обезбедување соодветна опрема за реагирање на вонредни состојби и ублажување на последиците од катастрофите. Граѓаните се повикани да избегнуваат активности на отворено, особено во крајбрежните подрачја за време на бури.

Фото: прес-материјал од настанот