Хаос со цените на становите во регионот — продаден квадрат за 12.000 евра во Белград, Скопје расте

Наместо очекувано поевтинување, цените на становите во регионот го продолжуваат растот и ги рушат претходните рекорди — податоците од соседството испраќаат јасна порака за притисок врз домашните купувачи.

Републичкиот геодетски завод (РГЗ) на Србија регистрираше дека во првото полугодие од 2026 година вкупниот промет на недвижности изнесувал 4,2 милијарди евра, што претставува раст од 10,1%. Иако бројот на купопродажни договори за станови забележал благ пад од 1,9%, вкупната вредност на прометот пораснала за 11,4%.

Во Белград се инвестирани 55% од сите пари за станови. Во општина Стари Град е регистрирана продажба на стан за 2,6 милиони евра, односно 12.000 евра за квадратен метар, а на иста локација е продадено и најскапото гаражно место — за 77.000 евра.

Какво влијание имаат рекордите врз нашиот пазар

Слични движења се забележуваат и во Хрватска: просечната цена на новоградба во Загреб достигна 3.518 евра за квадрат, што е скок од 18,9% во споредба со минатата година. Под тие услови, и Скопје бележи значителен раст.

Според анализите за првата половина на 2026 година, просечната барана цена за продажба на стан во Скопје изнесувала над 2.150 евра за квадратен метар, додека минатата година просекот бил околу 1.670 евра за квадрат. Во општина Центар, квадратот во новоградба на атрактивни локации веќе достигнува и до 3.000 евра, а Народната банка забележа годишен скок од 25% на цените на становите.

Тоа значи дека за стан од 60 м² во главниот град денес во просек се потребни околу 129.400 евра.

Експертите предупредуваат дека не постои ниту еден релевантен показател кои укажува дека цените ќе опаднат во текот на следната година. Најверојатно сценарио за Македонија е продолжување на трендот на раст, особено во привлечните скопски општини (Центар, Аеродром, Водно, Кисела Вода) и во туристички или економски развиените градови како Охрид, Штип и Битола.

Причините за продолжениот раст ги сочинуваат недостатокот од нови и квалитетни станови на добри локации, постојаниот пораст на цените на градежните материјали и работната сила и сè поголемиот број граѓани кои ги вложуваат своите заштеди во недвижности како заштита од инфлацијата.

Фото: прес-материјал од настанот