Хрват мапираше околу 5.500 локалитети преку бесплатната карта „HeritageMap“

Програмер од Осиек создаде бесплатна интерактивна мапа наречена „HeritageMap“ која ги прикажува маргинализираните делови од хрватското културно и историско наследство. Проектот содржи околу 5.500 локалитети — од урнатини и напуштени тврдини до мали цркви и археолошки наоди што ретко се појавуваат во туристичките списоци.

Проектот почна како хоби

Марко Млинаревиќ ја направил првата верзија на картата за приближно еден месец, работeјќи по еден или два часа дневно и за време на викендите. Со текот на времето ја надградувал со податоци за пешачки патеки, проценето време на пристигнување и тежина на пристап до пооддалечени локации.

При собирањето податоци, Млинаревиќ утврдил дека повеќе од 4.800 локалитети немаат посебна статија на Википедија на ниту еден јазик. За околу 600 места не постоел речиси никаков опис — само име, географска точка и забелешка дека локалитетот е заштитен како културно наследство.

Особено неочекувано биле подводните наоди: 168 потонати или делумно зачувани археолошки локалитети, меѓу кои бродоломи и антички пристаништа.

Податоците за HeritageMap доаѓаат од јавни регистри, Википедија, OpenStreetMap и други отворени извори. Картата е достапна бесплатно и им овозможува на посетителите да ги најдат локалитетите во својата близина или да планираат излет до заборавени тврдини и историски места.

Млинаревиќ се потпира на доброволни донации, а како што објаснува, најголемиот трошок е неговото лично време. Тој продолжува да ја уредува и надградува мапата додека ја држи слободно достапна за јавноста.

Фото: прес-материјал од настанот