И на 45 години не му е доста: Алонсо потпиша нов договор со Астон Мартин

Фернандо Алонсо ќе остане во Формула 1 и во 2027 година откако Астон Мартин официјално потврди дека двократниот светски шампион потпишал нов договор со тимот. На тој начин завршија шпекулациите околу иднината на 45-годишниот возач, кој претходно остави отворена можност за продолжување на кариерата, но и за заминување од спортот.

Исти возачи и за следната сезона

Астон Мартин, каде што Алонсо пристигна во 2023 година, соопшти дека новиот договор го задржува во екипата најмалку и во сезоната 2027, но точниот рок не е јавно објавен. Идниот состав на тимот ќе остане непроменет откако договорот го продолжи и Ленс Строл.

„Трките се мојот живот, мојата страст и знам дека сè уште ги имам брзината и решителноста за да се натпреварувам на највисоко ниво“, порача Алонсо по потпишувањето. Алонсо неодамна навести дека не размислува нужно тоа да биде неговата последна сезона во Формула 1.

Од доаѓањето во Астон Мартин во 2023 година, Алонсо има остварено осум пласмани на подиумот со тимот. Во текот на кариерата тој има 32 победи и рекордни 440 старта на ГН трки.

Со потпишувањето на новиот договор се обезбедува присуството на еден од најискусните возачи на патеката и се дава стабилност на возачкиот тим на Астон Мартин додека тимот се обидува да напредува во борбата во конкуренцијата на конструктори.

Фото: прес-материјал од настанот