Edhe në moshën 45-vjeçare Alonso nënshkruan kontratë të re me Aston Martin
Aston Martin e konfirmoi rinovimin e kontratës së Alonsos; skuadra do të garojë me të njëjtën përbërje në 2027.
Fernando Alonso do të vazhdojë të garojë në Formula 1 edhe në sezonin 2027, pasi Aston Martin konfirmoi se kampioni spanjoll me dy tituj botërorë ka nënshkruar një kontratë të re me skuadrën. Lajmi i jep fund spekulimeve për të ardhmen e 45-vjeçarit, i cili më parë kishte lënë të hapur mundësinë që të ndalë ose të vazhdojë karrierën.
E njëjta përbërje e shoferëve për 2027
Aston Martin, ku Alonso iu bashkua në 2023, bëri të ditur se marrëveshja e re e mban atë në skuadër të paktën deri në sezonin 2027, megjithëse afati i saktë i kontratës nuk është zbuluar publikisht. Përbërja e skuadrës do të mbetet e njëjtë pasi edhe Lance Stroll ka rinovuar kontratën.
”Garimi është jeta ime, pasioni im dhe e di që ende kam shpejtësinë dhe vendosmërinë për të konkurruar në nivelin më të lartë,” tha Alonso pas nënshkrimit. Ai kohët e fundit ka lënë të kuptohet se nuk e sheh domosdoshmërisht 2027 si sezonin e tij të fundit në Formula 1.
Që nga ardhja te Aston Martin në 2023, Alonso ka shënuar tetë podiume me skuadrën. Gjatë karrierës së tij ai numëron 32 fitore dhe mban rekordin për 440 gara të nisura në Formula 1.
Marrëveshja e re siguron praninë e njërit prej shoferëve më me përvojë në fushë edhe për një sezon të paktën, duke i dhënë Aston Martin stabilitet ndërsa skuadra përpiqet të ecë përpara në klasifikimin e konstruktoreve.
Foto: material shtypi nga ngjarja
