Идеалите на Ченто инспирација за Силјановска‑Давкова за 2 август

На 2 август во Скопје претседателката Гордана Силјановска‑Давкова од пред споменикот на Методија Андонов Ченто ги поврза идеалите на Ченто со денешните надворешнополитички избори на државата, нагласувајќи дека државата се брани со мудра надворешна политика и дека патот е проевропски ориентиран.

Од местото на комеморацијата таа посочи дека секоја земја кандидат треба да прави одредени прилагодувања, но предупреди на специфичните притисоци со кои, според неа, се оспорува правото на самоопределување. Таа рече:

"Нашиот пат е проевропски ориентиран, како и Чентовиот. Знаеме дека секоја земја кандидат прави компромиси врзани за адаптирање на односите и процесите на акито или решавање на различни спорови. Но нашето искуство има уникатен предзнак, како постојана и незавршена низа од барања со коишто се оспорува и се нарушува нашето суверено право на самоопределување ," порача Силјановслка Давкова.

Повик за помирување и уставен патриотизам

Во својот говор претседателката упати повик за национално помирување и надминување на поделбите, нагласувајќи дека на државата ѝ е потребен единствен глас кога станува збор за прашања од национален интерес и повикувајќи се на примерот на Ченто за спојување на различните гледишта под македонската линија.

На одбележувањето говореше и премиерот Христијан Мицкоски, кој во текот на својот настап евроинтеграциите ги спомена површно и ги поврза со критика на политичките противници. Тој порача:

"Никогаш нема да го прифатам нивното однесување на отстапки кон прашањата кои се блокада на нашиот пат кон ЕУ и никогаш нема да го разочарам народот. Јас предавства на штета на државата и народот, како што се правеше во минатото, по ниту една цена нема да направам ," изјави Мицкоси.

Силјановска‑Давкова дополнително се осврна на уставниот патриотизам и заштитата на правата на малцинствата: „АСНОМ води сметка за македонската мултиетничка реалност. Неговиот Манифест бил упатен до сите етнички заедници. И денес, се гордееме со високите стандарди на заштита на малцинските права на Албанците, Турците, Власите, Србите, Ромите, Бошњаците и другите. Споменати или не, во делот којшто му претходи на нормативниот текст, што вообичаено се нарекува преамбула, сите македонски граѓани ги уживаат истите права и ги имаат истите обврски кон државата, утврдени во нормативниот текст," рече претседателката, нагласувајќи дека мирот и соживотот во хетерогено општество се чуваат преку заштита на правата без штета по индивидуалните човекови права.

Фото: прес-материјал од настанот