Irani: Kërcënimet e Trump për ndëshkime ndaj vendeve që bashkëpunojnë me Teheranin shkelin sovranitetin dhe ligjin ndërkombëtar

Zëdhënësi i Ministrisë së Jashtme të Iranit paralajmëroi se kërcënimet e presidentit amerikan, Donald Trump, për ndëshkime ndaj vendeve që vazhdojnë të bashkëpunojnë me Teheranin përbëjnë shkelje të së drejtës ndërkombëtare dhe një përpjekje për të detyruar shtetet e treta të heqin dorë nga tregtia legjitime me Iranin.

“Presioni ekonomik i destinuar për t’i detyruar një shtet sovran të ndryshojë vendimet e tij legjitime politike është në kundërshtim me të drejtën ndërkombëtare,” shkroi Baghaei në platformën X, duke iu përgjigjur kërcënimeve të SHBA-së për të rritur sanksionet.

Teherani i quan të paligjshme “sanksionet sekondare”

Sipas zëdhënësit, të ashtuquajturat “sanksione sekondare” — masa të drejtuara ndaj vendeve të treta dhe kompanive që mbajnë lidhje me Iranin — shkelin Kartën e Kombeve të Bashkuara dhe parimin themelor të sovranitetit shtetëror.

Baghaei paralajmëroi po ashtu se nëse këto masa kombinohen me një bllokadë detare amerikane të porteve iraniane, ato do ta zvogëlonin sovranitetin e vendeve të tjera në diçka “të përkohshme, të kushtëzuar dhe të rishikueshme sipas humorit të një fuqie tjetër.”

“Rezultati përfundimtar do të ishte erozioni i plotë i sovranitetit si baza themelore e sistemit ndërshtetëror të bazuar në OKB dhe një recetë për rikthim të plotë të kolonializmit klasik në botë,” përfundoi Baghaei, duke shprehur kundërshtimin ligjor dhe etik të Teheranit ndaj strategjisë së Uashingtonit.

Foto: material shtypi nga ngjarja