Израел и Индија го прогласија Смит Мачхар за херој по принудното слетување на Flydubai

Израелски и индиски лидери го прогласија индискиот пилот Смит Мачхар за херој откако тој помогнал да се спречи паѓањето на авион на Flydubai, кој изврши принудно слетување во Табук, Саудиска Арабија. На летот од Дубаи кон Тел Авив биле 174 лица.

Израелскиот премиер Бенјамин Нетанјаху изјави дека е прерано да се каже што стои зад обидот на копилотот да предизвика пад на авионот и додаде дека Израел немал никакво предупредување или претходни разузнавачки информации за можен ваков инцидент.

Нетанјаху посочи дека напаѓачот е под истрага во Саудиска Арабија откако бил уапсен по принудното слетување, и дека очекува осомничениот да биде префрлен во Обединетите Арапски Емирати, од каде полетал авионот.

Според Нетанјаху, напаѓачот го избодел другиот пилот и наводно се обидел да го урне авионот. Патниците и екипажот го совладале напаѓачот и ја презеле контролата врз леталото, дозволувајќи му да слета безбедно во Табук.

Детали за херојскиот чин

Нетанјаху во објава на Икс го опиша спасувањето: "Мачхар лежел на подот целиот во крв, кога успеал да го активира механизмот за отворање на вратата од пилотската кабина. Тоа им овозможило на патниците и на екипажот да го совладаат другиот пилот и да им овозможат на другите двајца пилоти на 'Flydubai' кои летале со авионот да го приземјат леталото во Табук. Тој ги спаси животите на 174 луѓе", напиша Нетанјаху на Икс.

Индискиот премиер Нарендра Моди исто така го пофали Мачхар како херој. Индиските власти соопштија дека Мачхар добива медицинска нега во болница во Табук и дека се во контакт со неговото семејство; индиската амбасада во Саудиска Арабија објави: "Неговата состојба е стабилна." Израелскиот министер за одбрана Кац рече дека има индиции дека може да се работи за џихадистички терористички напад.

Фото: АП)