Јаневска до првачињата: Освен да стекнувате знаење, барајте си братче или сестриче

На првиот училиштен ден, министерката за образование и наука Весна Јаневска од ОУ „Ацо Шопов“ во Радишани, општина Бутел им порача на првачињата не само да се стремат кон знаење, туку и да размислат за идно зголемување на семејството — да „побарaт братче или сестриче“. Таа го поврза овој повик со потребата да се подигне свеста за човечкиот капитал и влијанието на демографијата врз училиштата.

Пад на бројот на првачиња и привремено затворање училишта

Јаневска наведе дека од овој септември има 3 000 првачиња помалку на ниво на државата и дека 26 училишта во руралните средини се привремено затворени, што, според неа, го отсликува долгогодишниот демографски пад.

„Ако продолжиме вака, ние постојано ќе затвораме училишта. Оттука, можеби порака до првачињата: освен да бараат да стекнат знаење, можеби треба да бараат да стекнат братче или сестриче за овие привремено затворени училишта во иднина повторно да ги отвориме. Населението да стане свесно колку човечкиот капитал е значаен, пред сè за нив самите и нивниот живот и, секако, за нивната држава“, рече Јаневска при посетата на училиштето во Радишани.

На новинарско прашање за намалениот број првачиња од речиси 3 000 за разлика од лани на ниво на државата, Јаневска, претходно, од ОУ „Киро Глигоров“, одговори дека „демографијата е посебна наука и многу нешта треба да се направат во тој правец“, и додаде дека во образованието се воведени мерки за подобрување на условите за учење.

Министерката потсети и дека пред две години биле изработени три сликовници за прво до трето одделение со наслов „Јас, мама, тато, дада и бато“ и изрази надеж дека училиштата ги користат. Таа нагласи дека државата вложува во инфраструктура, технологија и нови наставни помагала за да им го направи животот полесен на децата во Македонија.

„Сè што правиме е многу сериозно – инфраструктура, технологија, нови наставни програми, нови наставни помагала, учебниците се редовно снабдени. Сè со цел да им е попријатен животот на децата во Македонија. А, кога на децата им е убаво, и нивните родители ќе сакаат, претпоставувам, да останат тука и ќе се охрабрат да имаат повеќе дечиња“, рече министерката.

Јаневска исто така упати порака до учениците: „Навредите и насилството не се сила, тие се знак на слабост“.

Премиерот Христијан Мицкоски, при пуштањето во употреба на доградбата на ООУ „Ацо Шопов“ во Бутел, рече дека намалувањето на бројот на ученици е доминантно демографски проблем и дека решавањето бара враќање кон традиционалните семејни вредности уште од најмала возраст. Тој посочи дека во 2025 година се родени 15 650 деца, што е за 7 000 до 8 000 помалку во споредба со периодот пред седум–осум години, и дека ова директно се одразува врз намалувањето на бројот на паралелки и училишта.

„Се обидовме уште од најмали години, на најмалите преку една читанка ’Јас, мама и тато, дада и бато’, преведена на македонски, на албански и на другите јазици, да биде поделена во училиштата во кои се изведува на тој јазик наставата за да може уште од најмала возраст првачињата да сфатат што е семејство. Дека семејството не е јас, мама и тато, туку семејството е јас, мама и тато, дада и бато. Тоа е семејство“, додаде Мицкоски, повикувајќи ги и иселениците да се вратат и да помогнат во градењето живот во својата татковина.

Фото: прес-материјал од настанот