Јаневска: Училиштата да ги следат протоколите за постапување кога температурите се превисоки

Министерката Весна Јаневска повика училишта да го почитуваат протоколот за постапување кога температурите се превисоки, и посочи дека документите се објавени на веб‑страницата на Министерството за образование и наука и доставени до сите училишта.

Како што рече, од климатските промени не може да побегнеме, тие се еднакви за сите деца во Европа и во светот, па затоа наставата и активностите треба да се прилагодат на екстремните временски услови.

„Ако е жешко, нема да вежбаат физичко, ќе имаат одмор, ликовно, музичко, нешто друго… Јас не сакам да се мешам во нивната работа, но еве една идеја. Ако е постудено, ќе направат и некоја физичка вежба. Таму во протоколите пишува кога треба да се отворат, кога да се затворат прозорците, кои активности треба да ги имаат децата. Мора да се приспособуваме на сѐ што ќе биде предизвик“, изјави Јаневска.

Што содржат протоколите

Во протоколите, според министерката, се наведени конкретни мерки за организација на наставата во жешки денови – од упатства за проветрување до препораки кои наставни активности се соодветни при високи температури. Министерството ги објави упатствата и ги испрати до сите училишта.

На прашање дали ќе се обезбедат клима‑уреди, министерката одговори: „ќе има клими кога ние како држава ќе бидеме во можност да обезбедиме клими во сите училишта“. Таа го поврза обезбедувањето на уредите со можностите на државниот буџет.

Градоначалникот на Аеродром, Дејан Митески, изјави дека училиштата во општината ги следат протоколите изготвени од Министерството и од Центарот за јавно здравје и дека времетраењето на часовите се скратува само ако е прогласена жолта фаза. „Во случај кога ќе влеземе во жолта фаза со температурите, каде што има одредени гранични вредности за секој месец одделно, вклучително и септември, тогаш ќе постапиме во согласност со протоколот. Доколку има појава на жолта фаза, ќе се постапи по протоколот и ќе се скратат часовите, меѓутоа доколку немаме жолта фаза, нема да пристапиме кон скратување“, додаде Митески.

Фото: mon / Facebook