Јанг Дади ја промовира „EX YU“ со Сеад Зеле Липовача
Песната „EX YU“ и новиот спот со Катарина Ивановска и гостување на Сеад Зеле Липовача играат со рок-носталгијата во Скопје.
Јанг Дади ја објави новата песна „EX YU“ и придружниот видео-спот во кој го има и легендарниот гитарист Сеад Зеле Липовача од „Дивље Јагоде“.
Промена на имиџ, стара Лада и рокерска носталгија
Во спотот главна улога има Кики, ликот што го толкува Катарина Ивановска — паметна и самоуверена девојка со силна фасцинација за културата на поранешна Југославија. Наспроти неа е Јанг Дади, претставник на современиот скопски ноќен живот, кој брзо сфаќа дека неговиот вообичаен шарм нема да биде доволен.
За да ѝ се приближи, Дади го менува стилизирањето: перика, кожна јакна, прстени и обид да наликува на легендарниот Зеле Липовача. Во самата песна Сеад Зеле Липовача отсвирил гитарско соло и се појавува и во видеото, додека хуморот произлегува од потфрлањата на младата рокерска фасада — вклучително и борбата со старата Лада, од непознавање како да се отвори до туркање низ скопските улици.
Сценографијата — старата Лада, препознатливата градска архитектура и други скопски мотиви — не се само бекграунд туку дел од идејата за едно поинакво Скопје, каде што носталгијата и современиот градски живот влегуваат во контраст.
Проектот е издание на Авалон Продукција, а видео-спотот е реализиран во продукција на Такат студио. По излегувањето на песната, Јанг Дади ќе одржи голем концерт на 30 декември во Т Арената во рамките на Спортскиот центар „Борис Трајковски“. Влезниците се достапни преку продажната мрежа на Авалон Продукција и онлајн преку Avalon Booking.
Фото: прес-материјал од настанот
