Јапонската премиерка нашла лебарка во официјалната резиденција и рече дека нејзиното отстранување било „осамено“

Јапонската премиерка Санае Такаичи во искрен пост на Икс призна дека животот на врвот може да биде осамен откако во официјалната премиерска резиденција нашла лебарка и одлучила да не ја убие бидејќи си помислила дека можеби е „дел од долг циклус на реинкарнација“.

Кога персоналот ја нашол и ја отстранил лебарката, Такаичи напишала дека почувствувала „олеснување, но и мала осаменост, или можеби тага“.

Зошто ја користи резиденцијата

65-годишната Такаичи се преселила во официјалната резиденција во центарот на Токио во декември. Таа, која е опишана како опседната со работа, во јавноста се спротивставила на Си Џинпинг и на Владимир Путин, се зближила со Доналд Трамп и со Џорџа Мелони и често истакнува дека ноќе спие само неколку часа.

По примерот на својот, како што го нарекла, „исклучително добар пријател“ Доналд Трамп, Такаичи често комуницира директно со јавноста преку Икс.

Во серија објави таа објасни дека претпочита да работи од резиденцијата наместо од премиерската канцеларија: „Се трудам активно да ја користам премиерската резиденција, бидејќи така можам да го намалам бројот на вработени и припадници на обезбедувањето, вклучително и специјалната полиција, кои треба да бидат ангажирани.“

Повторно нагласила дека сака бројот на луѓе околу неа да биде што е можно помал. Во јули таа се пофали дека конечно успеала „да спие пет часа за првпат по долго време“, откако по стапувањето на функцијата ѝ станало навика да спие „од нула до три часа“ во текот на ноќта.

Нејзините објави следуваа по извештаи дека избегнувала да присуствува на парламентарни седници и дека поголемиот дел од времето го поминува во резиденцијата. Откако стана премиерка, Такаичи одржала најмалку седници на владата од сите јапонски премиери од 2012 година наваму.

Фото: EPA/KIM KYUNG-HOON / POOL