Јашар: Оваа Брегалница има хемија, допрва ќе го покаже својот квалитет

Голманот Амир Јашар најавува подобра Брегалница пред дуелот во Струга, во рамките на петтото коло од ПМФЛ.

Јашар, кој оваа сезона носи дрес на штипскиот клуб, истакна дека уште од првиот ден се чувствува прифатен и добива голема поддршка.

Доверба и тимска хемија

"Фудбалот е тимска игра, а јас од првиот ден во Брегалница се чувствувам како дел од едно големо семејство. Пред сè, сакам да му се заблагодарам на клубот што ме прими со раширени раце. Се чувствувам одлично и имам голема поддршка и доверба од управата, стручниот штаб и соиграчите. Ние сме семејство кое на теренот покажува што значи да се гине еден за друг. Имаме одлична хемија во клубот, меѓусебно разбирање и поддршка, а чувствуваме и огромна поддршка од градот Штип и од нашите навивачи. Брегалница допрва ќе покаже каков квалитет поседува. Со голема почит кон секој противник, но и со сериозност и карактер на теренот, одиме во Струга по првите бодови на гостински терен." – изјави Јашар за клупскиот сајт.

Реакцијата на Јашар доаѓа во период кога тимот гради ритам и се стреми кон подобри резултати во следните средби.

Брегалница ќе гостува во Струга со цел да освои свои први бодови надвор од Штип во петтото коло.

Фото: fkbregalnica.mk