Кефалогијани: Грција е безбедна за израелските туристи и покрај нападите

Министерката за туризам на Грција, Олга Кефалогијани, ги уверува израелските посетители дека земјата е безбедна и отворена, откако низа инциденти насочени против туристи предизвика реакција од грчката еврејска заедница.

Во изјава дадена во петокот, Кефалогијани порача дека државата „гарантира безбедност“ за сите посетители и го осуди насилството и говорот на омраза.

„Расистичките и насилните акти се казнуваат на примерен начин, добиваат целосна осуда и немаат место во нашата демократија. Грција останува целосно безбедна, гостопримлива и отворена дестинација… за израелските граѓани и сите други посетители“, рече таа.

Порака од Централниот одбор на еврејските заедници

Централниот одбор на еврејските заедници во Грција (КИС) изрази „длабока загриженост“ поради „серијата тешки инциденти што неодамна се случија на улиците на Атина и во другите региони на земјата, со цел заплашување и тероризирање на израелските туристи и граѓани што носат еврејски симболи или зборуваат хебрејски“. Одборот предупреди дека таквите настани ја поткопуваат имиџот на Грција како безбедна дестинација за сите.

КИС додаде дека „Длабока загриженост предизвикуваат постапките на организираните групи… кои повеќе не се двоумат да се закануваат со физичко насилство, со слогани што повикуваат на највулгарна форма на јудеофобична пропаганда, лансирајќи клеветнички обвинувања за геноцид со цел да ги заплашат и тероризираат луѓето од еврејската вероисповед“, и истакна дека нападите врз лица со израелско државјанство и блокадите на туристи во пристаништата „претставуваат очигледно кршење на законот и принципите на гостопримство и слобода на движење.“

Организацијата ја повика државата да ги преземе сите потребни мерки за да ја обезбеди заштитата на граѓаните и посетителите од расистичко или антисемитско насилство и да ги изведе сторителите пред грчката правда.

Фото: Ayhan Mehmet / AFP / Profimedia