Qipro propozon pjekurinë dixhitale nga 15 vjeç dhe kufizim të qasjes në rrjetet sociale

Qeveria e Qipros miratoi një plan veprimi që propozon të vendosë moshën minimale për qasje në rrjetet sociale në 15 vjeç, duke i ndaluar në praktikë fëmijët më të vegjël, njoftoi zëvendësministri për kërkim, inovacion dhe politikë dixhitale, Nikodimos Damianou, pas mbledhjes së kabinetit.

Plani mbështetet në tre shtylla kryesore: përcaktimin e "moshës për pjekuri dixhitale", zhvillimin e një mekanizmi dixhital për verifikimin e moshës dhe zgjerimin e edukimit dhe ndërgjegjësimit për fëmijët, prindërit dhe mësuesit.

Mekanizmi i verifikimit dhe kalendari parlamentar

Projekt‑ligji do të shkojë së shpejti për konsultim publik, dhe pritet të dorëzohet për votim në Parlament në dhjetor të këtij viti. Mjetet e verifikimit të moshës do të zhvillohen sipas modelit teknik të propozuar nga Komisioni Evropian (EU Age Verification Blueprint) dhe gjatë vitit të ardhshëm do të integrohen në aplikacionin qeveritar "Qytetari Dixhital", nëpërmjet të cilit përdoruesi do të mund të vërtetojë që i plotëson kushtet e moshës pa ndarë të dhëna të tjera personale.

Masat për edukim dhe ndërgjegjësim përfshijnë ristrukturim të gradual të programit mësimor në të gjitha nivelet, futjen e përmbajtjeve mbi përdorimin e sigurt dhe kreativ të internetit, trajnime për mësuesit, si dhe fushata të synuara, ditë informative dhe punëtori për nxënësit dhe prindërit.

Rreth nevojës për këto masa, Damianou theksoi: "Rrjetet sociale përdoren aktivisht nga 98 për qind e të rinjve në Qipro, përqindja më e lartë në Bashkimin Evropian. Megjithatë, vërehen rezultate të dobëta në aftësitë kyçe për vlerësimin dhe shqyrtimin e informacionit", tha ai.

Ai gjithashtu përmendi se studimet ndërkombëtare tregojnë lidhje midis përdorimit më të madh të rrjeteve sociale dhe sjelljeve të varësisë, neglizhencës ndaj aktiviteteve të tjera, konflikteve familjare dhe efekteve të tjera negative në jetën e përditshme. Lëvizja e qeverisë vjen ndërsa Brukseli po përgatit masa në nivel të BE‑s për të kufizuar qasjen në rrjetet sociale për fëmijët nën 15 vjeç.

Foto: Profimedia