Која Сања Божиновска бара извинување — Бугарката или Македонката?
Филипче го цитира записот од 6 декември 2013 и податоци дека Божиновска била управителка на 'Руднап Бугарија' во 2012–2014.
Лидерот на СДСМ, Венко Филипче, остро го постави прашањето кој всушност бара извинување по инсистирањето на министерката за енергетика Сања Божиновска – „Бугарката или Македонката“ — откако таа побара од СДСМ јавно да ги повлече тврдењата дека во периодот од 2011 до 2014 година била извршна директорка на компанијата „Руднап груп“ за Централна и Источна Европа.
Филипче наведува записи од регистрите и документи од фирмите
На денешната прес‑конференција Филипче рече дека изнесеното од СДСМ се факти. Тој истакна дека Божиновска работела во фирмата која сега ги доставила броилата и соработувала со истите луѓе во Србија. „Факт е дека таа работела во фирмата во која сега ги добила броилата и соработувала со тие луѓе во Србија. Од 2012 до 2014 година била управител на 'Руднап Бугарија'. Понатаму, во загрепската фирма 'Руднап' – 6 декември 2013 година во таа документација стои промена на регистрацијата и таму е идентификувана со бугарскиот пасош. Која Сања Божиновска бара извинување? Бугарката или Македонката. Да не бара Македонката за Бугарката?“ — рече Филипче.
Тој го постави и прашањето за чии интереси работи министерката, велејќи дека според податоците таа е идентификувана со бугарски пасош и дека отворено се изјаснила како Бугарка.
„Таа ли е една од причините зошто го одбија законот за да нема двојни државјанства на највисоки државни функции, па да не знаеме за чии интереси работат овие луѓе? Луѓе со двојни државјанства“, додаде Филипче, и порача дека СДСМ нема да се извини за фактичките податоци кои, како што рече, се достапни во централните регистри на сите засегнати земји и дека ќе дојде време кога ќе биде побарана одговорност.
Министерката Божиновска, од своја страна, тврди дека повеќе од 12 години нема никаква деловна ниту приватна релација со „Руднап“, ниту пак поврзаност со набавката и постапката што EVN како приватна компанија ја спроведува самостојно за своите потреби. Таа го повика СДСМ јавно во рок од 24 часа да ги повлече, како што наведе, невистинитите тврдења и да ѝ се извини, а најави и правни дејства ако не се повлечат обвинувањата. Опозиционерите возвратија со регистар со нејзиното име.
Фото: прес-материјал од настанот
