Крадци однеле 30.000 шишиња вино од Маркиези Антинори во Тоскана

Крадци однеле околу 30.000 шишиња вино — со вкупна вредност од приближно 5 милиони евра — од магацин на познатата италијанска винарија „Маркиези Антинори“ во Тоскана. Кражбата се случила во саботата додека компанијата се подготвувала да испрати пратка на странски клиенти.

Два камиона натоварени со највредните црвени вина

Претставници на винарницата соопштуваат дека најмалку седум маскирани мажи ги деактивирале алармите, ги исклучиле безбедносните камери и ги користеле фирмините виљушкари за да натоварaт два големи камиона. Меѓу украдените биле некои од највредните тоскански црвени вина на куќата — „Тињанело“ (Tignanello), „Солаја“ (Solaia) и „Гуадо ал Тасо“ (Guado al Tasso).

Извршниот директор на „Маркиези Антинори“, Ренцо Котарела, го опишал инцидентот како без преседан за Италија: „Кражба од вакви размери и со ваква вредност сигурно никогаш досега не се случила во Италија“, изјавил тој.

Котарела изразил надеж дека надлежните ќе успеат да пронајдат барем дел од украдената стока: „Два камиона полни со стока не можат едноставно да исчезнат без трага. Патиштата во Тоскана се покриени со камери — можеби, со малку среќа, ќе успееме да вратиме барем дел од украдените шишиња“, рекол тој.

Компанијата смета дека изборот на украдените шишиња укажува дека крадците биле познавачи на виното и имале информации однатре; цената на овие вина обично се движи меѓу 150 и 500 евра за шише. Кражбата била забележана дури во понеделник наутро, кога вработените пристигнале на работа, а засега нема приведени.

Винарницата Маркиези Антинори е основана во 1385 година, извезува во 170 земји и минатата година остварила приходи од 263 милиони евра.

Фото: прес-материјал од настанот