Крај за сообраќајниот хаос во Албанија: Полициски дронови ќе ги ловат прекршителите
Албанската полиција воведува нов систем за контрола на сообраќајот преку дронови и паметни камери. Целта е да се стави крај на самоволието на патиштата и драстично да се намали бројот на жртви.
Возачите во Албанија наскоро ќе мораат да бидат многу повнимателни, бидејќи државната полиција воведува строга контрола на сообраќајот од воздух. Со цел да се стави крај на хаосот и непочитувањето на правилата, надлежните најавија масовна употреба на полициски дронови кои ќе ги регистрираат прекршоците во реално време.
Оваа новина ја потврди албанскиот министер за внатрешни работи, Бесфорт Ламалари, кој истакна дека новите мерки се насочени кон оние кои се однесуваат привилегирано на патиштата. Според неговите очекувања, овој модерен пристап треба да придонесе за намалување на смртните случаи во сообраќајот за дури 45 отсто.
„Поздравете ги дроновите и чекајте казна“
Во своето обраќање преку социјалните мрежи, министерот упати остра порака до сите кои ги прекршуваат граѓанските норми и го блокираат нормалното одвивање на сообраќајот.
„Ако мислите дека сте привилегирани и дека можете да правите што сакате во сообраќајот, притоа да ги задржувате оние што ги почитуваат правилата, само поздравете ги дроновите над вас и почекајте да ве пресретне најблиската полициска патрола со казната“, порача Ламалари.
Тој нагласи дека поради нечиј каприц и неодговорно однесување, не смеат да трпат совесните граѓани кои доцнат и остануваат заглавени во колони.
Системот „Паметен град“ стапува на сцена
Покрај беспилотните летала, албанската полиција ќе се потпре и на мрежа од смарт-камери. Овие уреди, кои се дел од поширокиот систем „Паметен град“ (Smart City), наскоро ќе бидат стратешки распоредени на сите главни патни правци и национални пристапни патишта ширум земјата.
Со ваквата дигитализација на сообраќајната контрола, просторот за избегнување на одговорноста драстично се стеснува. Надлежните се децидни дека времето на толеранција за сообраќајното самоволие е завршено.
„Почнете да се навикнувате на идејата дека правилата се тука за да се почитуваат од сите“, заклучи министерот, најавувајќи нова ера во одржувањето на редот на албанските патишта.