Ладен бран: до петок дожд, на планините снег и многу ладни утра

Територијата на Македонија до крајот на оваа недела ќе остане под влијание на ладен воздушен бран што се спушта од север, со постудени утра, засилен ветер и локални врнежи, објави метеорологот Славчо Попоски.

Времето до петок (16 октомври)

До петок (16 октомври) ќе биде променливо облачно со сончеви периоди, а повремено ќе дува засилен до силен ветер од северен и од северозападен правец, кој повремено и локално ќе достигнува брзина од над 60 км/час.

„ Во петок (16 октомври) повторно ќе имаме локални врнежи од дожд со слаб до умерен, локално и со умерен интензитет, додека на планините со надморска височина од над 1500 метри ќе има повремени врнежи од снег. ” — кажа Попоски.

За викендот (сабота и недела, 17/18 октомври) се очекува поумирено време: сончево со мала до умерена локална облачност, а ветерот ќе ја намали својата брзина.

Наутринските температури ќе бидат значително пониски — на повеќе места ќе се спуштаат околу, па и под 5 степени, а особено на повисоките населени места и на планините ќе се спуштаат околу, па и за неколку степени под нулата. Дневните максимуми ќе бидат релативно ниски, во најголем дел до околу или под 15 степени, додека во Скопската котлина, централните и југоисточните предели локално може да се искачат близу 20 степени.

„Вистинската есен во Македонија е тука, тоа значи дека пред нас е значително ладен период а тоа значи дека топлата облека и тоа како ќе ни биде потребна, како и греењето во домовите„, објави тој.

Фото: прес-материјал од настанот