ЛДП бара итно разрешување и кривично гонење на Далибор Китановиќ

Либерално-демократската партија (ЛДП) побара итно разрешување и кривично гонење на директорот Далибор Китановиќ поради објава на фотомонтажа која, според партијата, претставува величење на осуден воен злосторник.

„Државната функција не смее и не може да биде штит од кривична одговорност. ЛДП бара итно разрешување на Китановиќ, а МВР и Јавното обвинителство веднаш да постапат по службена должност согласно членот 407-а од Кривичниот законик, бидејќи законите во оваа земја мора конечно да важат за сите подеднакво“, велат од ЛДП.

Правна рамка и критики

ЛДП ја оцени реакцијата на Владата — која наместо строг и итен чекор понудила можност тој „да си го повлече ставот“ — како скандалозна и лицемерна. Партијата потсетува дека за величење, одобрување и минимизирање на геноцид и воени злосторства членот 407‑а од Кривичниот законик предвидува затворска казна до пет години и дека по извршеното кривично дело не постои правна опција просто да се повлече ставот.

„Ова е уште една шлаканица за народот и за правната држава што не е ниту невиден, ниту првпат за оваа власт, туку таа во континуитет и мизерно продолжува да го практикува. Со случајот Китановиќ добивме уште еден доказ за скандалозните двојни аршини. Преку системот 'Сејф сити', секој обичен граѓанин се удира директно по џеб за најмал прекршок и тука нема простување, ниту можност за 'повлекување'. Кога обичниот човек ќе задоцни со плаќање сметка кон некоја државна установа, Владата не покажува никакво разбирање, туку веднаш му праќа извршители за блокирање на сметките. За граѓаните важи стриктно и немилосрдно почитување на законите, додека за владините функционери се резервирани изговори, беззаконие и простување. Срамота! Државната функција не смее и не може да биде штит од кривична одговорност. ЛДП бара итно разрешување на Китановиќ, а МВР и Јавното обвинителство веднаш да постапат по службена должност согласно членот 407-а од Кривичниот законик, бидејќи законите во оваа земја мора конечно да важат за сите подеднакво“, соопшти ЛДП.

Побараните мерки следат откако директорот на Агенцијата за остварување на правата на заедниците, Далибор Китановиќ, пред два дена на Инстаграм објави фотомонтажа на која Ратко Младиќ е прикажан заедно со личности од српската историја, меѓу кои и Дража Михајловиќ, а со големи букви е напишано: „Генерали на небеската војска“. Објавата предизвика силни реакции во јавноста, а од граѓанскиот сектор повикаа дека Китановиќ треба да кривично одговара.

Владата го повика директорот да се повлече од функцијата доколку не се согласува со ставот дека Ратко Младиќ е осуден за геноцид и воени злосторства. ДПСМ (Демократската партија на Србите во Македонија) на својот Фејсбук профил изрази поддршка за Китановиќ, споделувајќи коментари од социјалните мрежи во кои се изразува поддршка за него. Во исто време беа изнесени и прашања кога Владата ќе побара разрешување и за други функционери, меѓу кои беше споменат Иван Стоилковиќ, за кои беше кажано дека го глорифицираат Ратко Младиќ.

Фото: ЛДП