Maqedonia, Greqia dhe Shqipëria fillojnë përgatitjet për kandidaturën e Rajonit të Prespës në UNESCO

Ministrat e kulturës të Maqedonisë së Veriut, Greqisë dhe Shqipërisë nënshkruan një deklaratë të përbashkët për të nisur përgatitjet për kandidaturën e Rajonit të Prespës si pasuri botërore të UNESCO‑s. Takimi trilateral u mbajt në Bashkinë e Prespës në Greqi.

Ministrat që nënshkruan ishin Sedat Sulejmani (Maqedonia e Veriut), Lina Mendoni (Greqia) dhe Blendi Gonxhja (Shqipëria). Me vendimin nis një proces i koordinuar për përpilimin e dokumentacionit të nevojshëm për kandidaturën ndërkufitare.

Sedat Sulejmani theksoi: "Për mua, rëndësia e këtij angazhimi qëndron në menaxhimin afatgjatë dhe të qëndrueshëm të Prespës, me përfitime konkrete për komunitetet lokale. Duke bashkuar njohuritë, përvojat dhe vullnetin e mirë, mund të ndërtojmë një bashkëpunim të qëndrueshëm që mbron trashëgiminë dhe krijon mundësi për zhvillimin e rajonit."

Vlera e përbashkët dhe mbështetja ndërkombëtare

Në deklaratën e përbashkët ministrat e përshkruan Rajonin e Prespës si një peizazh unik natyror dhe kulturor me vlerë të jashtëzakonshme dhe një tërësi të ndërthurur territoriale. Ata shprehën bindjen se puna e përbashkët për mbrojtjen dhe njohjen e Prespës mund të shërbejë si shembull i bashkëpunimit rajonal dhe rolit që trashëgimia e përbashkët kulturore dhe natyrore mund të luajë si një urë mes fqinjëve dhe popujve.

Në takim morën pjesë gjithashtu Michalis Rokas, Shef i Delegacionit të Bashkimit Evropian për Maqedoninë e Veriut, Sinisa Sesum, kreu i zyrës së UNESCO‑s në Sarajevo, Rita Columbia, Koordinatore e Përhershme e Kombeve të Bashkuara në Maqedoninë e Veriut, dhe përfaqësues të institucioneve dhe autoriteteve vendore nga tre vendet.

Michalis Rokas deklaroi: "Bashkimi Evropian ka vendosur, përveç mbështetjes politike, të financojë studimet e para relevante për dorëzimin e kandidaturës, të cilat pritet të përfundojnë së paku brenda një viti. Bashkimi Evropian mbështet përpjekjet e përbashkëta të tre vendeve fqinje për të mbrojtur dhe nxjerrë në pah pasuritë mjedisore dhe kulturore që ato posedojnë në rajonin e Prespës."

Si hapa të ardhshëm u paralajmëruan përkufizimi i afateve për studimet dhe inventarizimet e nevojshme, koordinim i ngushtë në masat e mbrojtjes nëpër kufij dhe përfshirja e komuniteteve lokale, në mënyrë që një eventuale përfshirje e Prespës në Listën e Trashëgimisë Botërore të sjellë zhvillim të qëndrueshëm dhe përfitime konkrete për banorët e zonës.

Foto: Fejsbuk