Македонија и Србија утре ќе потпишат договор за гасоводно поврзување

Утре ќе биде потпишан договор за реализација на интерконекторски гасовод меѓу Македонија и Србија, а на официјалниот почеток на проектот ќе присуствува и премиерот Христијан Мицкоски, соопштија надлежни извори.

Во интервју емитувано во неделата за „Брајтбарт њуз“, Мицкоски изјави дека Македонија планира до почетокот на 2028 година да биде поврзана со терминалот за течен природен гас во Александруполис и преку мрежата на интерконектори да овозможи транспорт на американски гас кон Србија и Централна Европа.

Каков ќе биде капацитетот

„Сега ги градиме интерконекторите што ќе ја поврзат земјата со Грција и практично тој гасовод ќе води до ЛНГ-терминалот во Александруполис. Имаме резервирано четири капацитети на терминалот. Но тоа нема да биде доволно, па затоа инвестираме и во северниот интерконекторски гасовод, кој ќе го поврзе нашиот национален гасовод со српскиот“, рече Мицкоски.

Според него, така Александруполис преку Македонија и Србија ќе се поврзе со Централна Европа, сè до Унгарија и Австрија.

Мицкоски додаде дека планираниот капацитет на гасоводот е меѓу три и шест милијарди кубни метри годишно, со што би можел да стане конкуренција на руските гасни капацитети во регионот. Тој наведува и дека проектот може да придонесе за реализација на плановите на администрацијата на американскиот претседател Доналд Трамп за извоз на течен природен гас преку терминалот во Александруполис кон Централна Европа, додека Македонија северниот гасен интерконектор ќе го развива со сопствени буџетски средства.

Фото: EPA/Eustream