Мапите за туристи во Скопје со години нечитливи; градот најавува обновување за „Скопје 2028“

Секоја година во Скопје доаѓаат сè повеќе туристи, но основните сервиси што им го олеснуваат самостојното движење низ градот се во лоша состојба — највидливо тоа се тродимензионалните туристички мапи кои треба да ги насочуваат посетителите кон знаменитоcтите. Не станува збор за сместувачките капацитети, кои ги има доволно, туку за практичните пречки со кои се среќаваат оние што сакаат сами да го разгледаат градот.

За туристите што доаѓаат во групи и ги придружува туристички водич, разгледувањето е побезболно: обично се започнува од централното подрачје и покрај водичот на патеката им се придружуваат и десетина големи кучиња — староседелци на градскиот плоштад. Они кои пристигнале самостојно, пак, ќе треба повеќе да се снаоѓаат за да ги посетат сите локации на својата листа.

Поставени во 2011 — заборавени одржувањето

Тродимензионалните мапи беа поставени во 2011 година на 17 локации во централното подрачје, во Старата скопска чаршија и кај Милениумскиот крст на Водно. Тогаш беше соопштено дека мапите се направени на хартија со високи стандарди, отпорни на сонце и надворешни влијанија, и дека секоја содржи црвена точка што ја означува локацијата „тука се наоѓате“, како и сите други важни институции и обележја.

Денес зад стаклата на трите димензии има налепени плакати, исчкртани се со спреј и маркери, а на некои места стаклата се откинати — па картите, иако се тријазични, станале непрочитливи. Ние лично забележавме туристи кои се обидуваа да одгатнат што стои под исчкртаниците и налепниците наместо да читаат јасни информации.

Град Скопје вели дека е запознаен со состојбата на дел од туристичките мапи, кои неколку години се нефункционални. "Планираме, покрај обновување на постојните туристички мапи, да се постават и нови позиции за туристичките мапи на соодветни и фреквентни локации. Сметаме дека Скопје не смее да има туристичка инфраструктура што е нефункционална и запуштена. Напротив, сакаме да оставиме трајно унапреден и уреден градски простор, кој ќе продолжи да им служи и на граѓаните и на туристите, но и на целокупната економска гранка (туризмот, угостителството, трговијата и сл.)" — велат од Градот и најавуваат дека обновувањето ќе биде дел од активностите за проектот Скопје — Европска престолнина на културата 2028.

Мапите не се единствена слабост. На повеќето споменици и скулптури на пешачките мостови преку Вардар недостигаат таблички со имиња: на еден од мостовите под ниту една од 32‑те скулптури нема табличка, а на другиот — од кејот до зградата на Обвинителството — таблички има само на неколку од поставените 29. Јавниот превоз е збунувачки за странците: билетите за автобус се плаќаат само кеш, нема опција за плаќање со картичка, а на автобуските постојки често нема мапи со траси на линиите, па туристите мора да прашуваат случајни луѓе. До прекрасната Матка е тешко да се стигне — линијата 60 од Транспортен до Матка вози ретко, па ако се пропушти еден автобус може да треба да се чека повеќе од два часа за следниот. До Аквадуктот исто така нема нормален пристап или редовна автобуска линија, а реставрацијата таму трае со години.

Од Градот веруваат дека интервенциите поврзани со Скопје 2028 ќе ја подобрат туристичката инфраструктура: од замена и дополнување на информативните табли, до јасни натписи на спомениците и подобра информација за јавниот превоз, што локалните жители и стопанствениците се надеваат дека ќе вклучува и поинтензивно одржување на урбаниот простор.

Фото: ”Слободен печат” – Драган Митрески