Марија Спасовска со нова песна „100 промили“ и официјален видеоспот

Младата авторка и изведувачка Марија Спасовска ја објави новата песна „100 промили“, проследена со официјален видеоспот кој веднаш по премиерата е достапен на нејзиниот канал на YouTube и на сите дигитални музички платформи.

Кредити и реализација

За музиката и текстот на „100 промили“ стои самата Марија, додека аранжманот, миксот и продукцијата ги потпишува нејзиниот долгогодишен соработник Дарко Димитров. Видеото е во продукција на Artistic Film, а фотографиите од снимањето ги потпишува Стефан Јакимовски.

Во видеоспотот учествуваат и придружни танчерки, чија кореографија е на Eat The Beat Dance. Концептот комбинира сценски настапи, хореографија и актерска изведба која следи нарацијата на песната.

Музички, „100 промили“ ја продолжува модерната R&B–pop линија од дебитантскиот албум „Седатив“, издаден пред почетокот на летото. Станува збор за слоу-денс нумера со емотивен и заводлив вокал, и стихови кои таргетираат млада публика што ќе се препознае во чувството од ненадејна вљубеност: "кога најмалку очекува и ќе ја опие како алкохол во крвта… Од „100 промили“!"

Заводливиот изглед, хореографијата и актерската игра во видеото ја заокружуваат визуелната приказна и ветуваат дека „100 промили“ може да стане тригер-песна која дополнително ќе ја позиционира Марија во естрадната елита.

Песната е достапна на сите дигитални платформи, а официјалниот видеоспот може да се погледне на YouTube-каналот на Марија Спасовска.

Фото: прес-материјал од настанот