Мартина Ѓорѓиевска блесна во смарагдно на ревијата по повод 20 години „Кокев“

Мартина Ѓорѓиевска беше во центарот на вниманието на ексклузивната модна вечер на Камениот мост во Скопје, доаѓајќи рака под рака со сопругот — градоначалникот Орце Ѓорѓиевски. Настанот го одбележа јубилејот од 20 години од постоењето на модното ателје „Кокев“ и собра дизајнери, јавни личности, политичари и љубители на високата мода.

Смарагдно, едноставно и со ретки детали

За оваа прилика Мартина носеше тоалета до под во длабока смарагдно зелена нијанса, изработена од материјал со дискретен сјај кој паѓаше во богати дипли. Горниот дел се одликуваше со впечатливо деколте и црна наметка украсена со волуменозни цветни детали, што ѝ даде класичен гламур и нота на висока мода.

Целиот изглед го заокружи со сведена, модерна фризура во платинеста нијанса, минимален накит и металик чанта. Градоначалникот, пак, се појави во класично одело и кошула, совршено усогласен со изгледот на својата сопруга.

“Вечерва, заедно со мојата сопруга, присуствувавме на одбележувањето на 20 години успешна приказна на ателјето ‘Кокев’ – две децении посветеност, креативност, препознатлив стил и љубов кон модата. Камениот мост се претвори во вистинска модна сцена, каде низ ексклузивна ревија беше претставена сосема нова колекција“, сподели Ѓорѓиевски на социјалните мрежи заедно со фотографиите од настанот.

Орце и Мартина се во среќен и хармоничен брак повеќе од 16 години и се родители на синот Ведран. И покрај бројните обврски, градоначалникот честопати истакнува дека семејството му е на прво место и ја опишува Мартина како свој најголем советник и критичар со најдобри намери.

Мартина е позната по умерената и грациозна појава. Пред неколку недели таа беше предмет на шпекулации откако одредени политички кругови тврдеа дека носи брендирана чанта вредна 30.000 евра. Мартина јавно ги демантираше тие тврдења, покажувајќи дека чантата била купена на попуст за 944 денари во локална продавница и уште еднаш порачува дека стилот не се купува, туку е прашање на вкус и став.

Фото: прес-материјал од настанот