Мате Мишо Ковач погребан на Мирогој покрај синот Еди

Мате Мишо Ковач е погребан денес (во среда) на загрепските гробишта Мирогој, во кругот на семејството и покрај неговиот син Еди.

Легендарната музичка икона почина во саботата, во близина на Сплит, на 86-годишна возраст.

Во вторник, кој Владата го прогласи за Ден на национална жалост, на сплитскиот стадион „Пољуд“ се одржа јавен, масовен испраќај организиран од Хајдук, Торцида и Хрватската музичка унија. Околу 10.000 обожаватели и колеги музичари присуствуваа и ги пееја неговите најпознати хитови.

Посебно емотивен момент беше минувањето на возилото со посмртните останки, проследено со песната „Пољуби земју по којој ходаш“, која ја пееше целиот стадион. Возилото со ковчегот помина под источната, западната и северната трибина, а повеќе од 30.000 луѓе го испратија со стиховите од „Само нас небо раставит може“.

Од Мишо со песна се простија неговите бројни пријатели и колеги, додека молитвата ја предводеше фра Иван Утјешиновиќ. На испраќањето присуствуваше и премиерот Пленковиќ, кој истакна дека станува збор за пејач со најмногу продадени плочи и човек што длабоко ја одбележа Далмација и цела Хрватска.

Патувањето низ Далмација и последните почести

По испраќањето во Сплит, ковчегот со телото на Мишо тргна кон Задар, минувајќи низ низа места каде што граѓаните масовно се простуваа од ѕвездата. Илјадници обожаватели претходно се собраа и во неговиот роден Шибеник, каде на Плоштадот на Република Хрватска хорот ја изведуваше песната „Далмација во мое око“, „Ако ме оставиш“ и „Еден ден живот“.

Мишо Ковач останува запишан како еден од најпознатите и најпопуларните пејачи на забавна музика во регионот; неговата кариера опфати неколку генерации, а продаде повеќе од 20 милиони плочи. Неговите песни одамна станаа дел од културното наследство.

Комеморација во чест на Мате Мишо Ковач ќе се одржи во среда, 11 ноември, во 12 часот во Малата сала на Концертната дворана „Ватрослав Лисински“ во Загреб.

Фото: прес-материјал од настанот