„Мета“ претстави „отворен“ модел на вештачка интелигенција — секој ќе може да го симне и да го менува

Meta, компанијата сопственичка на Facebook и Instagram, објави нов модел на вештачка интелигенција што може да се превземе и да работи на обичен компјутер. Моделот, наречен Muse Glimmer, е дизајниран да функционира локално и да овозможи на корисниците и програмерите да го користат без постојана поврзаност со серверите на компанијата.

Muse Glimmer и објавувањето на Spark 1.2

Muse Glimmer е помал и оптимизиран модел создаден да извршува покомплексни задачи — меѓу нив и програмирање и активности кои ги вршат т.н. АИ‑агенти. Истовремено, компанијата најави дека ќе ги објави тежините од попотентниот Muse Spark 1.2, кој го опишува како еден од своите најнапредни модели и кој вклучува алатка за програмирање способна самостојно да планира, спроведува и проверува сложени промени во големи софтверски проекти.

Во обемно обраќање под наслов "Иднината е за сите", Марк Закерберг се спротивстави на идејата дека најмоќните системи за вештачка интелигенција треба да останат под контрола на мал број големи компании, влади или други институции. Тој ја застапува визијата за „лична суперинтелигенција“ — моќни АИ‑системи при рака за поединците и малите бизниси.

Закерберг предупреди и дека САД ризикуваат да ја изгубат предноста кај отворените АИ‑модели во однос на Кина, наведувајќи ги како примери растечките кинески играчи и модели, меѓу кои ги именуваше „Дипсик“, „Алибаба“ и З.АИ како особено конкурентни и широко користени.

Тој ја бранеше праксата наречена „дестилација“, при која помал модел се обучува врз основа на резултатите од поголем и посилен модел, и посочи дека Muse Glimmer е создаден користејќи ја токму таа метода врз основа на помоќниот Muse Spark. Закерберг исто така повика американските власти да не воведуваат ограничувања кои би го забавиле развојот на домашните отворени АИ‑модели.

Компанијата објави дека Muse Glimmer ќе биде достапен со отворен изворен код и лиценца што дозволува преземање, прилагодување и локална употреба, како дел од пошироката стратегија за отворање на тежините и проширување на пристапот до напредни модели.

Фото: прес-материјал од настанот