Мицкоски: Владата на СДСМ и ДУИ во 2023 воспоставила деловни односи со Давор Мацура, пред влезот на Алта банка во земјава

Премиерот Христијан Мицкоски, во својство на сведок на надзорната расправа во Собранието посветена на Алта банка, рече дека владата предводена од СДСМ и ДУИ во 2023 година веќе воспоставила деловни контакти со Давор Мацура пред таа банка да влезе на македонскиот пазар.

Документи и меѓусебни обвинувања

Мицкоски покажа официјална одлука објавена во Службен весник број 123 од 2023 година која, според него, потврдува дека тогашната влада дала согласност за продажба на акции во Стопанска банка АД Битола — институцијата што подоцна стана Алта банка. Тој исто така го цитираше извадокот од нацрт-записникот од владината седница од 24 октомври 2023 година како доказ дека прашањето било отворено во периодот кога премиер бил Димитар Ковачевски.

Држејќи го записникот во рака, Мицкоски се обрати кон пратениците и членовите на тогашната влада: "Дали тогаш тие не знаеле кој е Давор Мацура? Тогаш на владината седница била присутна половина влада. Сите тие гласале. Одлуката за влез на Давор Мацура ја носи владата на СДСМ со ДУИ. Нема да го читам целиот стенограм, нема да биде пристојно", рече тој.

Премиерот изнесе и подетална теза за наводните инструкции до државните органи: "Мојата теза е следна, дека во 2023 владата на СДСМ и ДУИ донела одлука да го задолжи државното правобранителство да стапи во комуникација со истото ова лице Давор Мацура и Алта банка Србија и да влезе во деловни односи со Алта банка. Вашата влада, господине Венко Филипче, и на ДУИ, на предлог на министерот од ДУИ, Фатмир Бесими, му наложува на Државното правобранителство да влезе во деловни односи со лицето Давор Мацура, сопственикот на Алта банка Србија, и да ги оттуѓи акциите во сопственост на Македонија, којашто ги има во банката којашто ја купува Давор Мацура, односно Алта банка. Така што многу пред да дојде Алта банка во Македонија вие како влада воспоставувате деловни односи со тоа лице", рече Мицкоски.

Разговорот ескалираше со пратеникот на СДСМ Венко Филипче, кој потсети дека Мицкоски бил премиер во 2025 година и дека Алта банка влегла на пазарот во време додека тој бил на таа позиција. "Вие бевте премиер во 2025 година. Алта банка влезе во време кога вие бевте премиер, а Трајко Славески гувернер", рече Филипче.

Филипче појасни и дека има прашања за кредибилитетот на сопственикот и правните ризици: "Ја браните банката како ваша да е. Како тука да влезе Дојче банк или некоја светска банка, а не Алта банка чиј сопственик сега е во затвор поради перење пари во Србија. Имате обврска да знаете каков е кредибилитетот на газдата на банката која влегува на пазарот. Тоа што случува е доказ дека нашето укажување е вистинито. Клучното прашање е зошто дозволивте влез на таква банка кај нас. Зошто не видовте како таа банка е казнета во Австрија. Која е цената што сега сите ние треба да ја платиме за сомнежот во банкарскиот сектор", посочи тој.

Пратеникот Бојан Стојаноски од ВМРО-ДПМНЕ повтори дека официјалната одлука објавена во Службен весник број 123 од 2023 година му давала согласност на претходниот кабинет за продажба на акции во Стопанска банка АД Битола и оцени дека тоа го отвора прашањето кои одлуки и од кој период биле клучни за влезот на Алта банка во земјава.

На крајот од расправата Мицкоски одговори на забелешки од пратениците: "Не сфаќам кое е моето својство тука, но ќе одговорам на сите прашања од пратениците", рече тој.

Фото: Принтскрин