Mikel Arteta zgjat kontratën me Arsenal dhe thotë se do ta rishikojë vetëm nëse “ndjen se diçka ka ndryshuar”
Arteta tha se vendimi erdhi pas përputhjes së vizionit me drejtuesit dhe se do të reflektojë vetëm në rast ndryshimi të ndjenjave të tij.
Trajneri i Arsenalit, Mikel Arteta, ka zgjatur kontratën me klubin dhe shkon drejt xhiros së gjashtë në Premier League me përballjen në shtëpi ndaj Leeds, e cila do të luhet nesër në orën 14:30. Do të jetë ndeshja e parë e skuadrës pas pushimit kombëtar dhe e para për Artetën që nga nënshkrimi i marrëveshjes së re.
Arteta për të ardhmen dhe për çështjen e Manchester City
Gjatë konferencës për shtyp, Arteta iu përgjigj edhe pyetjes për rastin me Manchester City — ku ai ishte asistent i Pep Guardiola-s gjatë një pjese të periudhës për të cilën tani klubi është shpallur fajtor për parregullsi financiare. Ai e përshkroi vendimin për të zgjatur kontratën si një nder dhe si rezultat të përputhjes së qëllimeve me drejtuesit e klubit.
“Për mua kjo është një nder i madh. Familja ime dhe unë jemi jashtëzakonisht mirënjohës që do të vazhdojmë të shijojmë këtë udhëtim të pabesueshëm, i cili nisi pothuajse shtatë vjet më parë.
Që nga fillimi thashë se klubi dhe unë dëshironim të njëjtën gjë. Gjithmonë kam besuar se kur përpiqesh të marrësh një vendim për të ardhmen, më e rëndësishmja në momentin e nënshkrimit është t'i shikosh të gjithë në dhomë dhe të shohësh buzëqeshje në fytyrat e tyre dhe entuziazëm në sytë e tyre.
Kjo është pikërisht ajo që ndjeva me Stan dhe Josh, pastaj me kreun ekzekutiv Rich Garlick, drejtorin për operacione futbolli James King dhe drejtorin sportiv Berta, por edhe me stafin dhe lojtarët. Çdo ditë duhet të tregojmë se e meritojmë të jemi në këtë nivel.
“Ndonjëherë duhet të ndalosh dhe të pyesësh veten: ‘Sa gjatë mund ta vazhdosh këtë?’ Dhe jo vetëm kaq, sa gjatë mund ta vazhdosh këtu? A ke dëshirën dhe energjinë e nevojshme? Si të shikojnë njerëzit përreth teje kur u flet atyre?
Përgjigjja ime ishte pozitive. Nëse një ditë ndjej se diçka ka ndryshuar, do ta rishikojmë. Kaq është, është e thjeshtë.”
Për ndërtimin e një “dinastie” te Arsenal, Arteta tha se është diçka për të cilën duhet luftuar çdo ditë, duke nënvizuar se standardet janë të qarta ndërsa entuziazmi dhe ambicia mbeten të mëdha. Kur u pyet nëse do të qëndrojë gjatë në detyrë, ai tha se ende ndihet i ri në karrierën e trajnerit dhe se vendimi do të varet nga perceptimi i tij për profesionin dhe nga pasioni i tij për lojën.
Foto: material shtypi nga ngjarja
