Миленкоски: Подготовките се реализираат според планот

Македонската машка одбојкарска репрезентација ги одработува подготовките за ЕвроВолеј 2026 во својата база во Крушево, а селекторот Јошко Миленкоски известува дека времето и организацијата овозможуваат спокоен и ефикасен тренинг.

Во планот е вклучено и присуство на дел од помладите одбојкари од поширокиот список на А‑тимот, кои тренираат тука и со селекцијата до 20 години, додека стручниот штаб е комплетиран.

„Сѐ оди според планот! Екипата, но и стручниот штаб се комплетирани, дел од младите одбојкари кои се на поширокиот список на А тимот тренираат тука и со селекцијата до 20 години. Имаме по два тренинга дневно, едноподруго сме во сала со младите, и во целост ја спроведуваме предвидената програма. Скоро по цел ден сме во сала“, објаснува селекторот Миленкоски.

Клучни приоритети

„Конкретно кај сениорската репрезентација сѐ е во најдобар ред. Како што планиравме акцентот е ставен на физичката подготовка и основната индивидуална техника за да може подготвени да влеземе во следната фаза на техничко- тактичка подготовка. Имаме одлични и временски услови во Крушево, комплетна сала на располагање и го користиме максимумот од тоа. Задоволен сум од тоа како се одвиваат подготовките и веруваме дека следниот период ќе продолжиме со квалитетната работа и на уште повисоко ниво.“ – вели селекторот Миленкоски.

Сениорите ќе останат во Крушево до 15 август, по што подготовките ќе продолжат во Скопје во СЦ „Јане Сандански“. Во втората фаза е предвидено да се одиграат три контролни натпревари на почетокот на септември пред заминувањето на ЕП во Софија.

Македонската репрезентација ќе настапи на своето четврто континентално натпреварување по ред од 9 до 26 септември и е во групата Б во Софија, каде ќе се соочи со домаќинот Бугарија, Полска, Португалија, Украина и Израел. Делегацијата тргнува за Софија наутро на 7 септември, а настапот се отвора на 9 септември во 20 часот против Бугарија.

Фото: прес-материјал од настанот