ММФ и Светска банка: Вештачката интелигенција е „бавно цунами“ што им се заканува на работните места

Првите лица на Меѓународниот монетарен фонд и Светската банка предупредија дека вештачката интелигенција (ВИ) го менува пазарот на трудот на глобално ниво и може да ги загрози голем дел од работните места, особено кај младите кои влегуваат на пазарот на трудот.

Раководници: растечки ризик за новите генерации

Директорката на ММФ, Кристалина Георгиева, го опиша доаѓањето на ВИ како „бавно цунами“ чијшто ефект ќе се шири постепено. "-Цунами со бавно движење, но сепак цунами. Влијанието со текот на времето врз работните места на глобално ниво го проценуваме на околу 40% – работните места или се зголемени, или се деградирани, или се елиминирани, а веќе гледаме дел од ова влијание," изјави Кристалина Георгиева.

Георгиева предупреди дека помалата изложеност на посиромашните земји не претставува предност, туку делумно ја отсликува побавната достапност и примена на технологијата. Таа ја спореди брзината на развојот на ВИ со трка во Формула 1 и истакна дека регулативите и бариерите за заштита не одат во чекор со напредокот, па затоа треба да се утврдат стандардите за безбедност.

На годишните состаноци во Бангкок, претседателот на Сингапур, Тарман Шанмугаратнам, апелираше до владите да соработуваат со приватниот сектор за да ја обезбедат првата работна прилика за младите. "-Владите мора да се вклучат во приватниот сектор за да ја овозможат таа прва работа, да го овозможат тој пат до првото скалило на вашата кариера. Не можете да си дозволите да го изгубите тоа, бидејќи ако го изгубите тоа, не само што ќе ја имате таа група млади луѓе кои чекаат една година, а потоа ќе се натпреваруваат со следната група следната година, туку ќе изгубите и повеќе од една година вештини ," вели Тарман Шанмугаратнам.

Претседателот на Светската банка, Аџај Банга, предупреди и за демографскиот притисок што се случува паралелно со технолошките промени: во следните 15 години околу 1,2 милијарди млади луѓе во земјите во развој ќе ја достигнат возраста за влез на пазарот на трудот, додека според сегашните проценки тие економии би можеле да создадат само околу 400 милиони работни места во истиот период. Банга посочи дека државите треба да вложуваат во инфраструктура, образование и деловна клима, додека приватниот сектор создава најголем дел од работните места — во некои економии помеѓу 75 и 85 проценти.

Во однос на монетарната политика, првиот човек на ФЕД, Кевин Ворш, увери дека институцијата ќе работи на стабилноста на цените. "-Во Федералните резерви, јасно ставивме до знаење дека ќе обезбедиме стабилност на цените и отстранивме доза на прилагодување пред околу еден месец, изјави Кевин Ворш-ФЕД."

Сè уште не може со сигурност да се предвиди како ќе изгледа пазарот на трудот за пет години. Како што нагласија учесниците, мерките што некои влади ги користеа за време на пандемијата или глобалната финансиска криза за да ги поттикнат компаниите да вработуваат млади луѓе треба да се разгледаат и како долгорочни политики кои ќе им обезбедат на младите прва шанса на пазарот на трудот.

Фото: прес-материјал од настанот