ММТ Групација ДООЕЛ Кочани ќе поднесе кривична пријава против раководството на ОФС Кочани

На 19 септември 2026 година ММТ Групација ДООЕЛ Кочани со официјално соопштение најави дека ќе поднесе кривична пријава до Основното јавно обвинителство – Кочани против Општинскиот фудбалски сојуз – Кочани и против одговорни лица, при што посебно го именува претседателот на ОФС Кочани, Александар Андов.

Во соопштението се наведува дека пријавата ќе се однесува на сериозни сомневања кои бараат институционална проверка, особено во однос на натпреварите од Општинската лига на Кочани и автентичноста на службената документација.

Што ќе побара обвинителството да утврди

ММТ Групација во текстот јасно ги набројува фактите кои треба да се проверат:

• дали сите натпревари заведени како одиграни навистина биле одиграни;
• дали за секој натпревар постојат оригинални службени записници и билтени;
• кој ги составувал, потпишувал и заверувал записниците;
• дали податоците во записниците одговараат на фактичката состојба;
• дали во службени исправи биле внесувани невистинити податоци;
• кој ги внесувал резултатите во службената евиденција; и
• дали врз основа на таквата документација биле вршени исплати на судии, делегати или други службени лица.

Во соопштението се посочува и дека ќе биде испитана улогата на Александар Андов, како претседател на ОФС Кочани и како личност вклучена во организацијата на натпреварите, водењето и заверувањето на службената документација, регистрацијата на резултатите и евентуалните финансиски исплати.

ММТ Групација ќе побара да се утврди дали евентуалното внесување невистинити податоци во службените записници и билтени ги содржи елементите на кривичното дело „Фалсификување службена исправа" согласно член 361 од Кривичниот законик, како и проверка за можни незаконски исплати или стекнување противправна имотна корист согласно член 355 – „Измама во службата".

Компанијата нагласува дека не ја прејудицира вината на ниту едно лице, но бара целосна и независна проверка и одговорност доколку се утврдат незаконитости. Во соопштението се вели: "Документите треба да зборуваат. Фактите треба да одговорат. Ако има фалсификување – одговорност мора да има."

Фото: прес-материјал од настанот