МНР повика бугарскиот амбасадор по приемот на Ива Михајлова во Софија

Министерството за надворешни работи и надворешна трговија денеска, на 13 октомври 2026 година, го повика амбасадорот на Република Бугарија во земјава, Желјазко Радуков, поради настаните поврзани со приемот на Ива Михајлова во Софија и најавите за нејзин прием на високо ниво.

Скопје: Приемот ја нарушува довербата и почитувањето на правото

На средбата, како што соопшти министерството, на амбасадорот му било пренесено дека начинот на пречекот и јавните најави за официјална посета се сметаат за провокација која ги нарушува напорите за градење доверба меѓу двете држави и е спротивна на заложбите за развој на добрососедски односи.

Од МНР посочиле дека таквото постапување претставува мешање во правниот систем на Северна Македонија и испраќа погрешна порака во однос на почитувањето на судските постапки и принципот на еднаквост пред законот.

„Националната припадност или поседувањето друго државјанство не смеат да служат како основа за заштита од одговорност пред надлежните институции“, се наведува во соопштението на министерството.

Министерството информира дека од Бугарија, како членка на Европската Унија, очекува почитување на европските принципи – владеење на правото, институционална соработка и почитување на судските процедури, и најави дека ќе ги информира меѓународните институции, особено Европската Унија и Советот на Европа, за случувањата.

Во заклучок, МНР повтори дека Северна Македонија останува посветена на развојот на добрососедските односи, но очекува истиот пристап и од бугарската страна, заснован на меѓусебно почитување, доверба и европски принципи.

Фото: прес-материјал од настанот