Муцунски: три стратешки интереси кои ќе ги претставиме пред Амбасадорскиот совет

Министерот за надворешни работи и надворешна трговија, Тимчо Муцунски, информира дека пред членовите на Амбасадорскиот совет денеска и утре ќе ги претстави трите стратешки национални интереси на државата. Советот се одржува во Скопје и на него учествуваат шефовите на македонските дипломатско‑конзуларни претставништва во странство; Муцунски и премиерот Христијан Мицкоски треба да ги пренесат државните приоритети во рамки на првата сесија.

Како врвни приоритети Муцунски ги наведе заштитата на националните интереси, користењето на потенцијалот на дипломатско‑конзуларните претставништва за унапредување на економската дипломатија и заштитата на граѓаните кои живеат или патуваат надвор од границите на државата.

„Прво е заштитата на македонските национални интереси. ​Второ е користењето на потенцијалот на нашите дипломатско-конзуларни претставништва во делот на економската дипломатија, но и стимулирање на трговијата, односно извозната компонента на нашата економија. ​Третата е заштитата на интересите на нашите граѓани надвор од нејзините граници — независно дали се тоа Македонци коишто живеат надвор од нашата држава или се тоа наши граѓани коишто патуваат заради различни причини. И во таа смисла тука зборуваме пред сè за конзуларните услуги и потребата од нивна модернизација, подобри услуги за Македонците надвор од границите на државата“, изјави Муцунски.

Пазари и проширување на соработката

Во одговор на прашање за кои пазари гледа најголем потенцијал, Муцунски истакна дека земјите членки на Европската Унија остануваат клучен трговски партнер, но посочи и други пазари кон кои Министерството испорачува засилен интерес.

„Тој ни е најзначаен трговски партнер – земјите членки на Европската Унија. Но, еднакво значајно во последниот период и импетусот, којшто го даваме насочен кон засилена трговска соработка со Соединетите Американски Држави. Скоро беше тука во посета претседателката на Индија. Индија исто така е еден значаен пазар. Земјите од Арапскиот Залив се исто така земји со коишто гледаме интерес и гледаме засилена соработка во следниот период. ​Така што, секако примарна ни е соработката со оние традиционални трговски партнери, но отвораме можности и за нови пазари и тоа се дел од приоритетите на нашите дипломатско-конзуларни претставништва“, рече Муцунски.

Муцунски дополнително нагласи дека овој Амбасадорски совет е прв што се организира во државата по 2019 година и дека настанот ја собира целата дипломатска мрежа на едно место.

„Ја собираме целата дипломатска мрежа на едно место“, вели Муцунски.

Фото: Фејсбук/Муцунски