МВР: 5 628 приведени во акцијата „Чистач“ — запленети дрога, оружје и пари
Од септември 2024 до денеска полицијата поднесе 1 135 пријави и изврши 1 158 претреси во рамки на операцијата.
Министерството за внатрешни работи (МВР) соопшти дека вкупно 5 628 лица се приведени од септември 2024 година до денеска во рамките на акцијата „Чистач“, чија цел е откривање и сузбивање на насилниот криминал, недозволената трговија со дрога и прекуграничниот криминал.
Според МВР, во текот на акцијата биле проверени и идентификувани 74 229 лица, извршени се 158 955 прегледи на лица, превозни средства и багаж, а полицијата реализирала 1 158 претреси во домови и други простории. Од тие дејствија биле поднесени 1 135 кривични пријави — 88 за дела од областа на насилниот криминал и 1 047 за дела поврзани со недозволена трговија со дрога.
За дел од осомничените се определени мерки притвор, а во некои предмети следеле и осудувања со изрекување на затворски казни.
„Во текот на реализацијата на акцијата запленети се значителни количини различни видови наркотични дроги, меѓу кои марихуана, кокаин, амфетамин, хероин, хашиш и таблети МДМА, како и оружје, парични средства, повеќе патнички моторни возила и мобилни телефони. Спречени се и повеќе меѓународни канали за недозволена трговија со наркотични дроги, особено на граничните премини 'Табановце', 'Деве Баир' и 'Стар Дојран'“, велат од МВР.
Во соопштението од министерството стои дека засилените контроли ќе продолжат и во наредниот период, со фокус на насилен криминал, трговија со дрога и прекугранични криминални активности.
Фото: прес-материјал од настанот
