MPB: 5 628 persona arrestuar në aksionin “Çistac”; drogë, armë dhe para të sekuestruara

Ministria e Punëve të Brendshme (MPB) njofton se 5 628 persona janë arrestuar që nga shtatori i vitit 2024 në kuadër të aksionit kombëtar “Çistac”, i ndërmarrë për të zbuluar dhe shtypur kriminalitetin e dhunshëm, tregtinë e paligjshme të drogës dhe rrjetet kriminale ndërkufitare.

Sipas ministrisë, deri tani janë kontrolluar dhe identifikuar 74 229 persona, janë kryer 158 955 inspektime të personave, mjeteve dhe bagazheve, si dhe janë bërë 1 158 bastisje në banesa dhe hapësira të tjera. Nga këto veprime janë ngritur 1 135 padi penale: 88 për vepra të kriminalitetit të dhunshëm dhe 1 047 për vepra lidhur me tregti të paligjshme të drogës.

Janë vendosur masat e paraburgimit për të dyshuarit, ndërsa në disa raste çuan edhe në dënime me burg.

"Gjatë realizimit të aksionit janë sekuestruar sasi të konsiderueshme të llojeve të ndryshme të drogërave narkotike, përfshirë marihuanë, kokainë, amfetaminë, heroinë, hashish dhe tableta MDMA, si dhe armë, para në dorë, disa automjete për pasagjerë dhe telefona celularë. Janë parandaluar edhe disa kanale ndërkombëtare për tregti të paligjshme të drogës, veçanërisht në pikat kufitare 'Tabanovcë', 'Deve Bair' dhe 'Star Dojran'." tha Ministria e Punëve të Brendshme.

Ministria theksoi se kontrollet e shtuara do të vazhdojnë edhe në periudhën në vijim, me fokus te kriminaliteti i dhunshëm, tregtia e paligjshme e drogës dhe veprimtari kriminale ndërkufitare.

Foto: material shtypi nga ngjarja